Shillong, K’Lyngkot 22
Na bynta ban ai jingshakri kaba kham bha ïa ki paidbah ka Jylla, ka Presbyterian Church of Wales (United Kingdom) kaba dei ka Balang Kmie haduh mynta ka dang ai jingkyrshan ïa ka Khasi Jaiñtia Presbyterian Assembly namar ka dang don bynta ban noh jingïarap ban tei biang ïa ka mala ba dang shu pynkha ha phyllaw jong ka Dr. H. Gordon Roberts Hospital, Shillong kaba don ha Jaiaw.
Kane ka jingïaikyrshan ka Presbyterian Church of Wales ïa kane ka hospital ka dei ka jingpynpaw u Pastor K Laloo uba dei u Secretary ka Organising Secretary jong ka hospital ha ka jingïadonlang u Tbn KK Mawa, Administrative Officer, Dr. Banhiam Kharngi.
Haba ïakren bad ki katto katne ki nongthoh khubor ha ophis treikam jong ka Robert Hospital, u Pastor K Laloo u la ïathuh ba naduh u snem 2022 ka jingpynkhreh ban tei biang ïa ki kamra ka la sdang ban bteng haduh mynta ban pynneh pynsah ïa ki matti jong ki missionary kiba la wan seng ha rilum Khasi bad Jaiñtia.
U la ïathuh ba katkum ka Detail Project Report la mang pynlut haduh 53 klur na bynta ka G-Plus-5 hynrei mynta la ïoh jingbit na ka MUDA tang ïa ka G-Plus-2 kaba ka jinglut ka long 33 klur tyngka kaba la kyrshan pisa na ka Presbyterian Church na Wales, ka ophis u Myntri Rangbah ka Jylla, ka jingnoh synñiang ki para bangeit bad ka jingïoh lum pisa na ka Organising committee kaba ju pynlong ïa ka jingïalehkai phutbol man u snem.
U la pyntip ba mynta u snem ka Charity Football kan pynlong ha ka 26 tarik mynta u bnai ha ka por 2:00 baje nohphai sngi ha madan SSA Polo ha kaba ki pastor ka KJP Assembly kin ïakhun pyrshah ïa ki dkhot ka Shillong Sports Association hapoh ka jingïalam u Bah Banteidor Lyngdoh uba dei u MLA.
Kum ban shu pynkynmaw ïa ka Robert Hospital kaba don ha Jaiaw la seng ha ka 25 tarik Lber 1922 da ki missionary na Wales kaba dei ruh ka jaka sumar kaba nyngkong ha kane ka Thaiñ Shatei Lam-Mihngi.
