Shillong, K’Lyngkot 22
U Nongïalam ka Cong-ress ha Meghalaya u Bah Vincent H Pala u la ïathuh ïa ka jingïaid shakhmat ka Sorkar Pdeng ba la ïalam da ka BJP ban bujli ïa ka MGNREGA sha ka VB-GRAMG skhim ka long kum ka jingthombor beit-beit ïa kiba duk ha ki thaiñ nongkyndong, kiba im ban kamai man ka sngi bad ki longïing ha Meghalaya kiba shaniah ha kine ka kam.
U la ong ba ki nongtrei jong ka seng bad ki paidbah nongshong shnong ki la shim bynta ha ka jingïalang paidbah ba la pynlong da ka Meghalaya Pradesh Congress Committee (MPCC) ha Mawkyrwat ha South West Khasi Hills District ban pynkhlaiñ ïa ka jingïakhih pyrshah ïa ka jingshah bujli ka MGNREGA.
U Bah Pala u la ban jur ba ka MGNREGA kam dei ka skhim ban ai jingmyntoi, hynrei ka dei ka hok ba la pynskhem da ka aiñ ban trei, kaba la pynskhem lyngba ka jingïakhih paidbah kaba neh.
Kano-kano ka jingkylla ne ka jingbujli jong kane ka aiñ, u la ong, ka pynpaw ïa jingbym suidniew ka Sorkar BJP ïa ka jingim ki briew ha ki thaiñ nongkyndong, ka jingïada ïa ki paidbah bad ka jingkitkhlieh katkum ka synshar paidbah.
Ka jingïalang ka pynkynmaw ïa ka bynta ba kongsan jong ka MGNREGA kaba la leh ban pynneh pynsah ïa ki hajar tylli ki ïing ki sem ha South West Khasi Hills, khamtam ha kito ki jaka nongkyndong bad ki jaka kiba mad jingjynjar ha ka ïoh ka kot.
Ki nongkren ki la kdew ba ka jingtyrwa ïa ka VB-GRAMG skhim ka duna ha ka jingtreikam kaba shai, ïa ka jingkyrshan jong ka aiñ bad ki sngi trei kiba tikna kaba pynlong ïa ka ban ym biang ha ka jingpynkylla bad bym lah ban shaniah ïa ka jingbujli ïa ka MGNREGA kaba buh hakhmat eh ïa ka jingïohi shai ban ïa ka jingpynkupbor kaba shisha ïa ki nongkyndong. Ki la maham ba ka jingtlot jong ka MGNREGA ka dei shibynta na ka rukom kaba khraw jong ka jingkhyllem noh ka aiñ ba kyrshan ïa ki paidbah ha Jylla bad ka Ri.
Ka Congress ka la khot ïa ki nongshong shnong ban long kiba ïatylli bad ban husiar pyrshah ïa ki polisi kiba pynjur ïa ka jingeh ha ki nongkyndong bad kiba ktah ïa ka ïoh ka kot jong ki.
