Shillong, K’Lyngkot 22
Ka lynti ïaid kjat jong ki paidbah ha Civil Hospital, Shillong ka la kylluid war bad ym don jingwit shuh hadien ba kiba shongdie jingdie ha katei ka jaka ki la kynriah noh shajan ka ophis jong ka tnad PWD ha Barik, ka jaka ba la pynbit pynbiang da ka Sorkar.
Kiba shongdie jingdie ha katei ka lynti ïaid kjat ha Civil ki la sdang ban kynriah naduh ka sngi Balang, kata ka 21 tarik u Kyllalyngkot 2026.
Hadien ka jingkynriah jong kitei kiba shongdie jingdie na katei ka jaka ka la long shisha kaba la pynsuk ïa ki paidbah ba ïaid lynti, namar ba kam don shuh ka jingkhapngiah ne jingwit ïa ki, haba ki ïaid lynti.
Ka jingkynriah kitei kiba shongdie jingdie na Civil Hospital ka wanrah ruh shibynta ïa ka khuid ka suba ïa ka lynti ïaid kjat jong ki paidbah. Shibynta ruh kam da ktah eh ïa ki paidbah ban thied jingbam, thied sha bad thied ïa ki tiar jingdonkam na ka bynta ban rah sha Hospital, namar ba ka jaka ba ki kynriah kam da dei eh sha jngai bad ka dang jan bad ka Hospital ruh.
Lah ban kdew ba ka Sorkar Jylla dangshen ka la dep ban pynkynriah lut ïa ki dukan baroh kiba shongdie jingdie ha lynti ïaid kjat ha Khyndailad shapoh khrum MUDA bad ka la don jingthmu ruh ban pynkynriah lut ïa ki dukan harud surok ha kylleng ki jaka ha Nongbah Shillong.
Ka jingthmu ka Sorkar Jylla ban pynkynriah lut ïa kiba shongdie jingdie ha ki jaka ba pynkhapngiah bad jaka ïaid lynti ki paidbah, ka dei ban pynlong ïa ka Nongbah Shillong kaba itynnad bad kaba kylluid haba ki paidbah ki pyndonkam ban ïaid lynti.
