Ka Mei mariang lane ka kmie mariang ka long kum ka kmie jong kiei kiei kiba don hapoh ka mariang. Haba phai ha ka rukom pynjot ïa ka Mei mariang ha kylleng kylleng ki jaka na ka ri. Ngi iohi ba kane ka jingpynjot ka la ktah ïa ki um ki wah, ki khlaw ki btap, ki dieng ki siej, ïa ki mrad ki mreng bad ïa baroh ki jingthaw baim ba don ha ki khlaw ki btap ha ki um ki wah ha kylleng ka Jylla. Ka ktah ïa u briew ruh namar ula doh noh ïa ka lyer pyngngad ba beh hir hir na ki lum ki them ba itynnad. Ka jingpynjot ïa ka mariang ka ktah ruh ïa ka jingkoit jingkhiah jong ngi ki briew namar ka mariang ka la kylla jaboh.
Ka jingtih maw tih shyiap bad khlong ïa ki maw ka pynjakhlia ïa ki um ki wah, ka pynjaboh ïa kit long um dih. Ka jingtih maw tih shyiap, tih maw shun ka pynsniew ïa ka Mei mariang. Ka tih dewiong bad ki mar poh khyndew baroh ka ktah ïa ka mariang. Ka jingpom ïa ki dieng ki siej bad ka jingthang rnga ruh ka ktah ïa ka mariang. Ka jingdon ki ïing ki sem harud wah ruh ka pynjakhlia ïa ki um ki wah. Ka mariang ka long kaba la ai bad buh da u Blei nongthaw nongbuh ïa ngi ki briew. Kumta ka jingpom pathar ïa ka Mei mariang. Ka jingtih surok ruh ka pynjaboh bad pyntngit bad pynkylla rong stem ïa ka um ha ki wah.
Ka jingpynjot ïa ka mariang ka ktah naphang lin ïa baroh ki jingdon jingem ha sla khyndew. Kane ka rukom tih paw tih shyiap ym lah ban kiar namar ki briew ki donkam ïa ki maw ki shyiap ban shna ïing shna sem. Hynrei ngi dei ban tih ha ka rukom ban lait na ka jingsynlen ki khlaw ki btap bad ki lum ki them. Kumne keiñ ngin tyngkai ïa ka Mei mariang.
C. B. Iawphniaw
