Jowai, K’Lyngkot 22
U Myntri ka tnad ka Koit ka Khiah ka Jylla u Ma Wailadmiki Shylla ha ka 22 tarik Kyllalyngkot u la plie paidbah ïa ka Health ATM Machine ha Jowai Civil Hospital, Ialong bad kumjuh ruh ïa ka MHIS Pharmacy ka ban treikam baroh 24 kynta.
Ha kane ka prokram la don lang ka Director ka tnad ka Koit ka Khiah ka Dr. J. Momin, u Deputy Commissioner ka West Jaiñtia Hills, Abhinav Kumar Singh, IAS, ka District Medical and Health Officer Dr P. Shylla, Medical Superintendent Dr. W. Lakiang nalor ki doktor bad ki staff nos ka Civil Hospital Ialong.
Ka Health ATM Machine ka dei ka kor sumar kaba lah ban pynlong ïa ki jingtest kiba bun jait kum ka Blood Pressure (BP), ka shini, ka jingshit jingkhriat jong ka met, ka ECG, ka SpO2, ka Hemoglobin bad kiwei kiwei bad la thied ha ka jinglut kaba T.3.8 lak hapoh ka CM-Catalytic Fund.
U Ma Wailadmiki Shylla ha ka jingkren u la ong ba ka Health ATM machine kan ïarap ban pynduna ïa ka jinglut jingsep ha ka jingsumar ïa ki nongpang namar ba ïa ka kaiphod test lah ban pynmih hapoh shi minit. Hynrei u ai jingmut ïa ki paidbah ba kim dei ban shaniah tang ha ka mashin bad ban leit wad jingmut beit na ki doctor ryngkat bad ka kaiphod jong ki.
U Myntri u la ong ba un buddien bha ïa ka jingtreikam jong kane ka mashin bad lada lap ba ka long kaba myntoi yn sa buh ïa ki mashin kiba kum kane ha kiwei pat ki Health Centre ba kynthup ïa ki CHC bad ki PHC.
U la pynpaw ruh ïa ka jingsngewkmen halor ka jingplie ïa ka Pharmacy kaba treikam 24 kynta, da kaba kdew ba ka dei ka Pharmacy kaba ar jong ka hospital Sorkar ha ka Jylla ban treikam baroh shisngi.
U Ma Wailadmiki u ai khublei ïa ka jingtrei shitom jong ki nongtrei ka koit ka khiah ha baroh ar tylli ki thaiñ West bad East Jaiñtia Hills District, da kaba pynpaw ba ka jingaiti lut jong ki ka la ïarap ban pynduna ïa ka jingïap jong ki longkmie bad ki khunlung ha kane ka thaiñ.
U la pyntip ruh ba mynta ka sngi la pynlong ïa ka jingïalang bishar bniah bad ka tnad ka koit ka khiah jong ka West bad East Jaiñtia, ha kaba la ïakren ïa ki mat kiba ïadei bad ki nongtrei, ki dawai bad kiwei kiwei ki jingdonkam.
U Deputy Commissioner u Abhinav Kumar Singh u la ong ba kane ka mashin kan ai jingmyntoi shibun ïa ki paidbah namar ba ka lah ban leh haduh 60 tylli ki test. U la bynrap ba da kaba pyndonkam ïa kane ka mashin kan pynduna shibun ïa ka jinglut jingsep jong ki paidbah.
U Medical Superintendent u Dr. Lakiang u la kdew ba kane ka mashin kan pynduna ïa ka jingtrei jong ki nongtrei hospital. Lada pyndonkam hok, lah ban pynïar shuh shuh ïa ka jingshakri. U la pyntip ruh ba arngut ki nos ki la shah hikai bad ai kam ban pyntreikam ïa kane ka mashin.
Ha kane kajuh ka sngi la aiti ïa ki work order na ka bynta ban tei ïa ki Health Sub-Centre kiba thymmai kata ha Ialong bad Sabahmuswang ban kyntiew ïa ka jingshakri ha ka koit ka khiah sha ki paidbah.
Ïa ka sub centre kaba don ha Ialong yn shna ha ka jinglut kaba T.55.50 lak katba kaba ha Sabahmuswang ka long T.55.05 lak.
