Nongstoiñ, K’Lyngkot 25
Ka lympung ïalehkai District Cricket League 2025-2026 jong ki ar tylli ki kyrdan ba kynthup ïa ka First Division bad Super Division ba la pynïaid da ka West Khasi Hills District Cricket Association (WKHDCA) ka la nangjam shakhmat.
Ka jingïalehkai qualifier-2 jong ka First Division kan long mynta ka lah sngi U Blei.
Haba phai sha kane ka lympung ïalehkai mynta ka samoi ,ha ka Super Division kaba la long ha ka 22 tarik mynta u bnai ka Pyndengrei SCSC ka la pynliem noh ïa ka Challenger CC da 91 run.
Ha katei ka jingïalehkai, ka Challenger kaba la jop ïa ka kynting pisa ka la ailad ïa ka Pyndengrei ba kan tied nyngkong ha kaba ka la kamai 228 run bad shah pynhap 8 wiket ha ki 35 over.
Ha kaba beh ïa ka thong, ka Challenger ka la kamai tang 138 run hadien ba ka la shah pynkhyllem baroh ki nongtied ha ki 27.4 over. U Aron A. Nongrum u la ïohpdiang ïa ka nam Player of the Match.
Haba phai sha kawei pat ka jingïakhun ka Nongpyndeng SS&CC ka jop da 1 wiket ïa ka Nongstoiñ SS&CC. U Atiar Bakynsai Myrthong u la ïohpdiang ïa ka nam Player of the Match.
Haba phai pat sha ka jingïalehkai qualifier -1 jong ka First Division, ka Upper New Nongstoiñ ka la pynliem noh ïa ka Nongkyna YFS&CC da 5 run bad ka la rung syndon sha ka final. U Donboklang R. Lyngdoh u la ïohpdiang ïa ka nam Player of the Match.
Shuh shuh , ha ka jingïalehkai ‘eliminator’, ka Youngstar United ka la jop da 84 run ïa ka Mawïong Lumsyntiew bad u Naveen Kumar Ray u la khur ïa ka nam Player of the Match.
Na ka liang ka WKHDCA ka la pyntip ba ka jingïalehkai Qualifier-2 jong ka First Division kan long mynta ka lah sngi U Blei ha ka por 11 baje mynstep hapdeng ka Nongkyna YFS&CC pyrshah ïa ka Youngstar United CC ha madan Mawrusyiar, West Khasi Hills.
