Itanagar, K’lyngkot:
Ki bor pahara ki la pynjot ïa ki Poppy ba la rep ha Longding distrik jong ka Arunachal Pradesh.
La pyndonkam da ki Drone na ka bynta ban peitngor ban ithuh bad pynjot ïa ki lyngkha poppy.
Ym shym la mudui mukotduma namar ba bun ki nongrep kim tip ïa ka jinglong beaiñ jong ka jingrep poppy.
Ki bor pahara ki la pynjulor ïa ki jingthung poppy kiba la saphriang ha ka jaka kaba heh 8 akar ha Longding distrik jong ka Arunachal Pradesh, la ïathuh ki pulit ha ka 25 tarik u Kyllalyngkot.
U heh pulit jong ka Longding, u Dekio Gumja, u la ong ba la lap bad pynpra ïa ki jingthung jingtep beaiñ ha ki shnong Votnu bad Khasa, kiba don marjan bad khappud ka India bad Myanmar.
Ïa kane ka jingkhynra la pynlong ha ka 23 tarik u Kyllalyngkot kum shi bynta ban ïaleh pyrshah ïa u drok.
Ïa kane ka jingpynjot la peit da u Executive Magistrate jong ka Pangchau Circle bad la pynlong hadien ba la jurip bniah ïa katei ka jaka.
Wat hapdeng ki jaka kiba eh, hynrei la pyndep suk ïa ka jingtrei da kaba pynïadei bad ki bor shnong bad shim ïa ki ha ka jingshaniah, la ong u SP.
La pyndonkam da ki Drone na ka bynta ban peitngor bad ban jurip na suiñ ban ithuh ïa ki lyngkha poppy, kaba la pynlah ïa ka kynhun ban wad bad pynjot ïa ki jingthung ha ka rukom kaba biang.
Ym shym la don kano kano ka mukotduma pyrshah ïa ki nongrep, namar ba bun na ki kim tip ba ka jingrep poppy ka dei kaba beaiñ, la ong u Gumja.
U la bynrap ba ki jingpyrshang mynta kin long ha kaba pynsngewthuh ïa ki nongshong shnong shaphang ka jingsniew jong u drok bad ban thaw ïa ka jingsngewthuh shaphang ki lad rep kiba pher bad kiba lah ban neh.
Katkum ka jingong jong ki heh sorkar, ka jingrep ïa u poppy ha ki katto katne ki shnong khappud ka ju ïadei bad ka riti dustur, ha kaba bun ki nongrep ki rep ïa u nyngkong eh na ka bynta ban bam hi.
Ki bor pynïaid ki la ong ba ki jingpynsngewthuh paidbah kiba bteng kin long kiba donkam bha ban tehlakam ïa katei ka jingleh.
