Aizawl, K’lyngkot:
U Myntri Rangbah ka Mizoram, u Lalduhoma ha kine ki khyndiat sngi ba la leit u la batai ïa u drok kum u nongshun ba khraw tam jong ka jylla bad ki paidbah jong ka, da kaba khot ïa ka jingpyrshang lang jong ka sorkar bad ka imlang sahlang ban ïakhun pyrshah bha ïa kane ka jingma.
U Myntri Rangbah u la kren ïa kane haba pynïaid ïa ka jingïalang bad ki heh sorkar bad ki nongmihkhmat jong ki sengbhalang ba pawnam ban bishar bniah ïa ki kam pyrshah drok ha ka jylla, ong ka kyrwoh ba la pynmih da ka Information and Public Relations Department jong ka jylla.
Ha kane ka jingïalang la don lang u Myntri ka tnat ki kam pohïing ka jylla u K. Sapdanga, Myntri ka tnat Excise and Narcotics u Lalthanliana Hmar, ki heh ophisar na ka tnad Home and Excise, bad ki nongïalam jong ka Central Young Mizo Association (CYMA) kaba dei ka seng bhalang kaba heh tam ha ka jylla Mizoram.
U Lalduhoma u la ïathuh ba ki pulit ka jylla ryngkat ka jingïatreilang bad ka tnad Excise bad ka CYMA ki la pynlong ïa ka jingïakhih pyrshah drok kaba heh bha hapoh ka lama ‘Operation Jericho’ ha ka 22 tarik, Nailur jong u snem ba la lah, ka la thmu ban khanglad ïa ka jingkhaïi drok shapoh ka jylla.
