Shimla, K’lyngkot:
Ka jinghap ïor bad u slap ba jur ha kylleng ka Himachal Pradesh ka la pynlong ïa ka jingkhang palat 1,250 tylli ki surok, kaba la pynthut jur ïa ka jingim ba man ka sngi ha kylleng ka jylla ba don ha ka jaka lum, wat haba ki nongjngohkai pyrthei ki dang ïai bteng ban tuid sha ki jaka ba la tap da u slap ban ïoh mad ïa ki jinglong jingman ba itynnad jong ka por Tlang.
U Myntri ka Public Works Department (PWD) u Vikramaditya Singh u la ong ba ki kor treikam jong ka sor ki la treikam ha ki surok ba la shah ktah khnang ban ïohlad ban pynïaid biang ïa ki kali.
Haba kren bad ki lad pathai khubor, u Singh u la ong, “Ar sngi shwa, palat 1,250 tylli ki surok ki la shah khang ha kylleng ka jylla. La pyrshang ban plie biang ïa ki. Phi lah ban ïohi ïa ki kor pynkhuid ïa ka ïor bad ki mashin jong ka JCB ba la buh ha ki jaka bapher bapher ha kylleng ka Himachal Pradesh.”
U la kdew ba watla ka jinghap ïor ka la wanrah jingeh, hynrei ka la wanrah ruh ïa ka jingpyntngen kaba donkam bha hadien ka jingap kaba slem.
“Ki paidbah jong ka jylla ki la khmih lynti ïa u slap bad ka ïor la slem bha bad bad ka la jia ha kaba la sakhi ba ka la jur bha. Nga ai khublei ïa ki nongrep bad nga ainguh ïa baroh ki blei jong ka jylla, namar kane kan ai jingmyntoi ïa ki jingthung kiba dang wan, khamtam ha ki jaka lum,” la ong u Myntri.
U Singh u la bynrap ba ka tnad ka dang ïai bteng ban pynkhuid ïa ki surok bad ban ïarap ïa ki nongjngohkai pyrthei kiba sahkut.
“Ki nongjngohkai pyrthei ki la sahkut ha ki katto katne ki jaka. Ngi don ha ka jingïatreilang kaba man ka por bad ki bor synshar distrik, kynthup ïa ki SP bad ki DC, ban pynthikna ïa ka jingsuk kaba khraw tam. Ki la don katto katne ki jingeh kiba la shah ktah katkum ka jinglong jingman jong ka mariang, hynrei ngi dang pyrshang ban pynkhuid ïa ki surok kham kloi katba lah,” u la ong.
Haba pynpaw ïa ka jingmyntoi kaba jrong por, u Myntri ka tnat PWD u la ong ba ka jinghap ïor kaba kham jur kan ïarap ban pynbiang biang ïa ki tyllong um bad ban pynneh ïa ka jingsngem jong ka khyndew, kaba long kaba kongsan bha na ka bynta ki kper soh.
“Kumba 3,500 tylli ki mashin la pyntreikam ha kylleng ka jylla, bad lada donkam, yn sa pynbeit shuh shuh. Yn plie biang ïa ki surok ha ka por kaba kloi tam,” u la pynthikna.
U Singh u la pdiang sngewbha ruh ïa ki nongjngohkai pyrthei, da kaba khot ïa ki ba ki long kiba kongsan bha na ka bynta ka ïoh ka kot jong ka jylla.
“Ka long kaba bha ba ki nongjngohkai pyrthei ki wan; ka wanrah ïa ka jingkmen bad pynkhlaiñ ïa ka ïoh ka kot jong ngi. Ka Himachal ka dei ka Devbhoomi bad ka ngeit ha ka ‘Atithi Devo Bhava’. Hynrei, ki nongjngohkai pyrthei ki dei ban leit jingleit da ka jingkitkhlieh bad pynthikna ba kano kano ka kam kan ktah ïa ka kolshor, ka pateng, ne ka jingsngew niam jong ka jylla,” u la ong.
Wat hapdeng ki jingkhang surok, ki jingsawa jong ki kali, bad ki jingpynbna shaphang ka jinglong ka suiñbneng, ki nongjngohkai pyrthei ki dang ïai bteng ban sngewtynnad ïa ka jinghap ïor.
Ki bor pyniaid ki la kyntu ïa ki nongshong shnong bad ki nongjngohkai pyrthei ba kin long kiba husiar, ban bud ïa ki jingbthah, bad ban kiar na ki jingleit jingwan ki bym donkam namar ba ka jinglong jingman kaba sniew ka lah ban dang bteng ha ki sngi ban wan.
