Guwahati, K’lyngkot:
Wat hapdeng ki hukum ba pyrkhing bad kiba tyngeh na ka sorkar bad ki bor synshar distrik, ki jingpynkheiñ ïa ka polisi ‘No Helmet, No Petrol’ ki dang ïai bteng khlem sangeh ha ki katto katne ki jaka theh umphniang ha Morigaon, kaba la pynmih ïa ka jingsngewkhia kaba jur halor ka jingpyntreikam ïa ka jingshngaiñ ha surok.
Ïa kane ka policy la wanrah ban pynthikna ïa ka jingshngaiñ jong ki nongñiah kali ar shaka da kaba pynlong ïa ka jingpyndonkam ïa ka helmet shwa ban ai umphniang. Hynrei ki dur ba dang shen na kawei ka petrol pump jong ka Indian Oil ha Naokata ha Morigaon ki la pynpaw ïa ka jingbym kheiñ snep ïa kane ka kyndon. La ïohi ïa ki nongtrei jong ka Pump ba ki dang pynbiang umphniang ïa u nongñiah kali ar shaka uba khlem deng ïa ka helmet.
Haba la kylli, u nongtrei jong ka pump uba donkti u la ai ïa ka jingpynshisha kaba pher, da kaba kynnoh ba u nongñiah kali u ïakynduh ïa ka “jingjia kaba kyrkieh” ne u don ha ka kam kaba kyrkieh, bad kumta la pynbiang ïa ka umphniang watla um don ïa ka helmet. Kaba sngewsih ka long ba ka jingthoh kaba heh ha ka jingkhang jong kajuh ka pump umphniang ka la thoh shai “NO HELMET, NO PETROL,” kaba pyrshah ïa ka rukom kaba la bud hapoh katei ka jaka.
Utei u nongtrei ka pump u la pynithuh ïalade kum u Babu Bora bad u la pynpaw ba u la trei ha katei ka jaka die um la saw ne san bnai ba la dep. Kaba la pynjur shuh shuh ïa ka jingsngewkhia ka long ba la ïathuh ba la sakhi biang ïa ki jingpynkheiñ kiba kum kine, kaba pyni ba kum kine ki jingpynkheiñ kim dei ki jingjia ba kyrpang hynrei ki dei ki bynta jong ka rukom kaba ju jia man ka por.
Ka jingpynkheiñ biang biang ïa ki kyndon jingïada ka la pynmih ïa ki jingkylli hato ki bor pynïaid jong ki petrol pump ki ailad ne em ïa ki nongtrei jong ki ban ïaid lait ïa ki kyndon da ka jingpynbyrngia ba ki dei ki “jingjia ba kyrkieh.” Wat hapdeng ki jingpynjari aiñ man ka por da ka bor synshar distrik, ki jingpynkheiñ kiba dang bteng ki kdew ïa ka jingpyntreikam kaba tlot ha ka jaka.
Mynta dang sah ban peit kaei ka sienjam ba ki bor tnad ba dei peit kin leh pyrshah ïa ki jaka theh umphniang kiba dang ïai bteng ban pynkheiñ ïa ka polisi ‘No Helmet, No Petrol’, kaba pynthut ïa ka aiñ bad ïa ka jingshngaiñ jong ki nongpyndonkam surok.
