Shillong, K’Lyngkot 27
Ka Donkins CC ka la long ka lahduh ha ka First Divi-sion Cricket League 2026 ba la pynïaid da ka Shillong Cricket Association, hadien ba ka la pynliem noh ïa ka Lawsohtun CC da 3 wiket ha ka sngi Ba-ar.
Ha katei ka jingïakhun final kaba la long ha madan jong ka MCA ha Polo, ka Lawsohtun ka la kam trai ba kan tied nyngkong ha kaba ka la kamai 135 run bad shah pynkhyllem baroh ki nongtied ha ki 36 over. U Peter Lyngkhoi u la tied 42 run na ki 74 bol bad u Edmund Dhar u la ïoh 21 run na ki 36 bol. Katba u Agreas Cham Cham Sangma bad u Pynkop Bonney ki la khur mar 3 wiket na ka bynta ka Donkins.
Haba wan shimti ïa ka pali kaba ar, ka Donkins ka la lah ban kynjoh sha ka thong da kaba kamai 136 run bad shah pynhap 7 wiket ha ki 30.3 over. U Bhuwan Thapa u la khyrwit ïa ka shiteng spah kaba 50 run na ki 54 bol bad u Agreas Cham Cham Sangma u la ïoh 28 run na ki 47 bol. Katba u Hilarious Thabah u la khur 3 wiket bad ïa ki 2 wiket la ïoh da u Peter Lyngkhoi. Ïa ka nam Player of the Match la khur da u Agreas Cham Cham Sangma.
Te kumta ka Donkins bad ka Lawsohtun ki la jam sha ka Super Division ha kaba kin ïoh ban shim bynta naduh ka aïom ka ban wan.
