Agartala, K’lyngkot:
U Myntri Rangbah ka Tripura, u Manik Saha, ha ka 28 tarik u Kyllalyngkot, u la ong ba ka sorkar pdeng bad ka sorkar jylla ba la ïalam da ka BJP ka long kaba skhem bha ban kyntiew ïa ka roi ka par ha baroh ki liang jong ka imlang sahlang ki riewlum jong ka jylla, kaba, u la ong, ka la shah pynduh noh ïa ki jingmyntoi ba dei hok jong ka, da ki phew snem.
Haba kren ha ka jingïalang paidbah ha Sabroom, u Saha u la ong ba ka synshar paidbah ka ïoh ïa ka bor ba shisha na kaba pynkupbor ïa ki riew paidbah bad ban pynthikna ïa ka jingïashim bynta kaba radbah jong ki ha ka jingsynshar.
U la kdew ba ki sorkar kiba bud ha ki por ba la leit noh kim shym la lah ban weng ïa ki jingeh kiba la slem bha jong ki jaitbynriew riewlum, hynrei ka sorkar kaba mynta ka la shim ïa ki sienjam kiba neh ban pyndap ïa kine ki jingduna.
“Da ka thong ban kyntiew ïa ka imlang sahlang ki riewlum, ka sorkar kaba don mynta hapoh ka jingïalam jong ka Bharatiya Janata Party ka trei shitom khlem shongthait,” ong u Myntri Rangbah ka Jylla ha ka jingthoh ha ka social media ha ka rynsan X.
U Saha u la kdew ïa ka jingwan thep vote jong ki shynrang bad kynthei riewlum ha ka jingïalang paidbah jong ka BJP kaba la long ha madan jong ka Shyam Singh Higher Secondary School ha Sabroom kum ka sakhi ba ka jingkyrshan paidbah ka nang kiew.
U la ong ba ka India, kum ka ri kaba laitluid, kaba synshar hi bad kaba synshar paidbah kaba heh tam ha ka pyrthei, ka roi ha ka jingïashim bynta jong man la ka jaitbynriew.
Ka jingwan jong ki jaitbynriew riewlum ha ki prokram paidbah, u la bynrap, ka pyni ïa ka jingngeit ba thymmai jong ki ha ki kynhun synshar paidbah bad ka jingthmu pynroi jong ki sorkar ba la ïalam da ka BJP ha baroh ar ki jaka jong ka sorkar pdeng bad ka sorkar jylla.
U Myntri Rangbah u la pynpaw biang ba ka sorkar kan bteng ban pynleit jingmut ha ka jingroi kaba kynthup lang, ban pynthikna ba ki jaitbynriew riewlum kin ïoh ïa ka bhah kaba dei hok ha ki jingthmu pynroi bad ka bha ka miat ha baroh ki liang.
