Shillong, K’Lyngkot 28
Ka Uttarakhand bad ka Assam ki la khur jingjop ha ka sien kaba nyngkong na ka Group-A ha ka wat ba khatduh jong ka 79th National Football Championship na ka bynta ka Santosh Trophy 2025-26, hadien ba ki la pynliem noh ïa ka Nagaland bad ka Rajasthan ha ka sngi Balang ha Dhakuakhana, Assam.
Ka West Bengal kaba danglamkhmat ha kane ka group ka la shah khate poiñ hadien ba kala ïakhaid mar 1-1 kol bad ka Tamil Nadu. Te kumta kane ka kynhun ka la kamai 10 poiñ na ka bynta ban ïai bat ïa ka kyrdan ba hakhlieh. Ka Tamil Nadu ka la wan ba-ar bad kamai 7 poiñ, ha kaba la bud sa ka Rajasthan (6 poiñ), Assam (5 poiñ), Uttarakhand (4 poiñ) bad ka Nagaland (1 poiñ). Sa tang kawei ka jingïakhun ha kane ka group ban ïakhun, ka Nagaland ka la shah weng noh.
Haba phai sha kine ki jingïakhun hapdeng ka West Bengal bad ka Tamil Nadu ki la long kiba ïakhaid bha ha ka rukom ïalehkai ha kaba kim shym la lah ban thep kol ha ka kylla step. Dei ha ka kylla miet ba ka Tamil Nadu ka la pynkhih jar nyngkong lyngba u Nandha Kumar Ananthraj ha ka minit kaba 61. Hashwa ban wai ka West Bengal ka la lah ban pynphai kylla lyngba u Sujit Sadhu (81).
Ha ka jingïakhun kaba ar, ka Uttarakhand ka la pynliem noh ïa ka Nagaland da 2-1 kol.
Tang mar ïasdang ka jingïakhun ka Nagaland ka la ïoh ban pynkhih jar nyngkong eh ha ka minit kaba 8 lyngba u Laiwang Bohham, hynrei ka Uttarakhand ka la lah ban pynphai kylla ar kol ha ka kylla miet lyngba u Ajendra Singh (55) bad u Nirmal Singh Bisht (57).
Haba phai sha kawei pat ka jingïalehkai kaba khatduh, ka Assam ka la pynliem noh ïa ka Rajasthan da 3-0 kol. Ïa kine la thep da u Pragyan Gogoi ha ka minit kaba 33, kumjuh u Pranjal Bhumij (43) bad u Akrang Narzary (65).
Ka Meghalaya kaba don ha ka Group-B, kan ïakhun pyrshah ïa ka Kerala mynta ka sngi Palei ha ka por 2 baje nohphai sngi ha Silapathar.
