Shillong, K’Lyngkot 28
Ka Perkseh SC ka la shah pynhiar kyrdan sha ka Second Division hadien ba ka la mad ïa ka jingshah rem ha ka Wahlyngkien Sunei SC da 2-1 kol ha ka jingïalehkai (group) kaba khatduh jong ka lympung ïalehkai First Division ba la pynïaid da ka Tyrsad Area Sports Association (TASA) ha ka sngi Ba-ar.
Ha kane ka jingïalehkai jong ka Group-A kaba la long ha Mawlum Tyrsad, baroh ar ki kynhun ki la ïakhun tyngeh naduh kaba sdang. Ka Perkseh ka la pynkhih jar nyngkong eh lyngba u Kemingstar Lyngkhoi ha ka minit kaba 13, hynrei ka Wahlyng-kien ka la pynïakhaid lyngba u Banshanboklang Blah (28). Hashwa ban wai ka Wahlyngkien Sunei ka la lah ban pynskhem ïa ka jingjop lyngba ka jingïarap pynthep da u rangïalehkai ‘dien ka Perkseh ha ka minit kaba 90+2.
Te kumta ka Wahlyngkien Sunei ka la lah ban pyllait ïalade na ka jingshah pynhiar kyrdan ba ha kaba ka la wan ha ka kyrdan basaw bad kamai 6 poiñ, katba ka Perkseh kaba la don ha ka kyrdan ba shatrai ka la kamai 5 poiñ.
Ha kawei ka jingïakhun, ka Mawdngong ka la ïakhaid mar 1-1 kol pyrshah ïa ka Mawlum Tyrsad bad kine ki kynhun ki la jam sha ka semi final. Ïa ka kol na ka Mawlum Tyrsad la thep da Wadlang Jaba (13), hynrei na ka liang ka Mawdngong ka la pynphai kylla lyngba u Kiranstar Kharshiing (54).
Te kumta ka Mawdngong ka la ïaryngkat mar 7 poiñ bad ka Mawlum Tyrsad na ka bynta ban wan ha ka kyrdan nyngkong bad ba-ar na katei ka group.
Haba phai sha ka jingïakhun jong ka Group-B, ka Thaiñthynroh SC ka la jop da 2-0 kol ïa ka Kyrphei SC. Ïa kine la thep da u Judgesonwell Wartah ha ka minit kab 2 bad Bhaboklang Kharryngki (38).
Lyngba kane ka jingshah rem ka Kyrphei ka la shah pynhiar noh sha ka Second Division.
Na ka liang ka TASA ka la pynbna ba ïa ka jingïakhun semi final hapdeng ka Mawdngong pyrshah ïa ka Umkaber yn pynlong ha ka 30 tarik, katba ka Mawkynroh ïa ka Mawlum Tyrsad yn pynlong ha ka 3 tarik u Rymphang. Kine ki jingïakhun kin long ha ka por 2 baje nohphai sngi.
Kane ka synjuk ka la pynbna ruh ba ïa ka semi final jong ka Second Division hapdeng ka Nongmadan pyrshah ïa ka Pomsanngut ka long ha ka 30 tarik ha ka por 12 baje mynsngi, katba ha ka 3 tarik u Rymphang kan long hapdeng ka Mawsawrit pyrshah ïa ka Pyndenumbri ha ka por 12 baje mynsngi.
