Shillong, K’Lyngkot 28
Ka Sputnik CC ka la khur ïa ka jingjop ha kaba sdang ïa ka Super Divi-sion Cricket League 2026 ba la pynïaid da ka Shil-long Cricket Association, hadien ba ka la pynliem noh ïa ka Nongthymmai SCC da 91 run ha ka sngi Balang.
Ha kane ka lympung ki don 12 tylli ki kynhun ha kaba la phiah ïa ki ha ki ar tylli ki group. Ha ka Group-A ki long ka Sputnik, Nongthymmai, Langsning, Royal, Nongmynsong bad ka Lumpyngad, katba ha ka Group-B ki long ka Rangkynsai, Young Guns, Sputnik Spartan, Sporting, NFU bad ka Lok Bhavan.
Haba phai sha kane ka jingïakhun kaba la long ha madan jong ka MCA kaba ha Polo, ka Sputnik ka la kam trai ban tied nyngkong ha kaba ka la kamai 330 run bad shah pynhap 8 wiket ha ki 40 over. U Arien B Sangma u la long u nongtied uba la ïoh bun da kaba u la khyrwit ïa ka shiteng spah kaba 82 run na ki 95 bol bad u Kshitij Singhania u la ïoh 58 run na ki 32 bol. Katba u Banïalam Mylliemngap u la khur 3 wiket bad ïa ka 1 wiket la khur da u Ram Najiar na ka bynta ka Nongthymmai.
Haba wan beh ïa ka thong ba la buh da ka liang pyrshah, ka Nong-thymmai ka la kamai tang 239 run bad shah pynhap 7 wiket ha ki 45 over. U Sagar Chetri u la khyrwit ïa ka shiteng spah kaba 94 run na ki 81 bol bad u Gaurav Narleng u la ïoh 65 run na ki 79 bol. Katba u Nafees Siddique bad u Arbin Singh ki la khur mar 2 wiket na ka bynta ka Sputnik. Ïa ka nam Player of the Match la ïoh da u Arien B Sangma.
Ka jingïalehkai ha ka sngi Palei kan long hapdeng ka Rangkynsai pyrshah ïa ka Young Guns naduh ka por 8:30 mynstep.
