Shillong, K’Lyngkot 28
Ka kynhun ki nongïalehkai ka Jylla hapoh ka lama jong ka Muay Thai Association of Meghalaya (MTAM) ka la wan ba-ar ha ka 7th UMAI National Senior Muay Thai Championship kaba la long ha SS Convention Centre, Shamshabad Airport, Hyderabad hadien ba ka la khur 55 tylli ki takma.
Ha kane ka lympung kaba la sdang naduh 22 haduh 25 tarik mynta u bnai ba la pynïaid da ka Telangana Amateur Muay Thai Association, ka Meghalaya ka la khur 27 tylli ki tama ksiar, kumjuh 17 tylli ki tama rupa bad 11 tylli ki tama rnong ha ki kyrdan ïalehkai Under-23 Combats, Above-23 Elite, Waikru bad ka Mai Muay.
Kat kum ka kyrwoh la ong ba ki nongïalehkai kiba khur takma ksiar na kane ka lympung ki la shah jied ban mihkhmat ïa ka ri India sha ka IFMA Senior Men’s & Women’s World Muay Thai Championship ka ban long ha Kuala Lumpur, Malaysia naduh 6 haduh 16 tarik u Jymmang mynta u snem.
Ha ki kyrdan senior jong ki kynthei, ka Elizabeth Marten u la ïohpdiang ïa ka nam Best Fighter. Ki la don haduh 29 tylli ki kynhun kiba la wan shim bynta na ki 28 tylli ki jylla jong ka ri.
Ïa katei ka kynhun la pdiang burom ha Indoor Stadium Hall kaba ha Saiden Nongpoh, Ri Bhoi District hadien ba ki la wanphai sha la ïing. La pdiang ïa kane ka kynhun da ki nongïalam ka synjuk kiba kynthup ïa u President, Secretary, Treasurer bad ki Coach bad kiwei kiwei.
Na ka liang u President u Bah A. Sun u la ai khublei ïa kitei ki nongjop kiba la wanrah burom ïa ka Jylla hi baroh kawei bad kumjuh u la kyntu ïa kito ki bym shym la lah ban kynjoh sha ka thong ba kin nangtrei shitom nangne shakhmat khlem da duh jingkyrmen.
