Shillong, K’Lyngkot 29
Hadien san snem ka Lawmali Pyllun Sports Club ka la lah ban bteng biang ïa ka lympung ïalehkai na ka bynta ban saiñdur ïa ka lawei jong ki heprit ïa kaba la tip kum ka 20th U-12 Inter-House Football Tournament na ka bynta ka (L) LM Syiemlieh Memorial Trophy, kaba la sdang ha ka sngi Palei ha madan Pasteur Hill kaba ha Lawmali Pyllun Block-1.
Ïa kane ka lympung la lah ban pynkhie im biang naduh ba la sdang nyngkong eh ïa ka ha ka por ka jingwan ka khlam Covid-19 kata ha u snem 2020.
Ki kynhun kiba la wan ïashim bynta ha kane ka lympung ki don san tylli kiba kynthup ïa ka Black Cat, Black Panther, Tiger, Puma bad ka Leopard.
Hapoh kine ki 20 snem, kane ka lympung ka la lah ban sei ïa ki khynnah kiba don ïa ki sap ïalehkai ba kyrpang bad kiba bun ki la don bynta ha ki klob bapher bapher jong ka Jylla bad ha kylleng jong ka ri. Napdeng kine, ka Bonifilia Shullai, ka la long kawei na ki khlur ïalehkai kiba tyngshaiñ ha ka kam ïalehkai phutbol ha kaba ka la ïoh ban mihkhmat ruh ïa ka ri India ha ki lympung ïalehkai shabar ri ha u snem 2018 bad 2020. Haduh mynta katei ka samla ka dangdon hapdeng ka jingpynkhreh ban mihkhmat biang ïa ka India ha ka AFC Championship ka ban sa long shen mynta u snem.
Ïa kane ka lympung la wan ban plie da u Vice President ka Meghalaya Football Association (MFA) Bah Cliff Nongrum ha kaba la ïadon lang ki nongïalam jong ka Lawmali Pyllun Sports Club bad kiwei.
Haba ai jingkren ha katei ka sngi plie ïa katei ka lympung, u General Secretary ka Lawmali Pyllun Sports Club u Adelbert Pyrtuh u la kdew ba ïa kane ka lympung ïalehkai la pynlong naduh u snem 1990 bad haduh mynta ka dangïai bteng na ka bynta ban kyntiew ïa ka jingïalehkai phutbol. Te kumta u la pynshlur ïa ki khynnah ïalehkai ba kin buh ïa ka thong ha ka jingim jong ki da kaba pynleit jingmut ha ka jingïalehkai phutbol khnang ba kin nangkiew shaphrang.
“Ngi kwah ban ïohi ïa phi baroh ba phin ïalehkai ha ki lympung ïalehkai kiba heh. Hynrei ban kynjoh sha kata ka thong, phi dei ban trei shitom bad ban long kiba don akor”, u la bynrap.
Ha kawei pat ka liang u Vice President ka Meghalaya Football Association (MFA) u Bah Cliff Nongrum uba la plie ïa kane ka lympung, u la ïaroh ïa ka jingshim khia ka Lawmali Pyllun SC ban pynlong ïa kane ka lympung kaba long shi bynta ban saiñdur ïa ka lawei jong ki khynnah ha ka kam ïalehkai phutbol khnang ba kin long kiba paw ym tang hapoh ka Jylla hynrei wat haduh ban kin ïoh ka lad ban mihkhmat ïa ka ri India. Te kumta u la ban jur ba kum kine ki lympung dei ban pynlong man ka por khnang ban kyntiew ïa ka jingïalehkai phutbol.
“Kane ka lympung ka long tang ka jingsdang. Hynrei ha ka lawei ka ban wan phin sa ïoh ban mihkhmat ha ki lympung ïalehkai kiba kham heh bad ruh ha ki madan kiba heh,” u la bynrap.
Shuh shuh u Bah Nongrum u la pynbna ruh ba na ka liang ka MFA kan sa pynlong ïa ka prokram jied khynnah ki ban ïoh rung hapoh ka shlem ai jinghikai khnang ba kin ïoh ïa ki jingshah hikai kiba paka. Kane ka jingjied khynnah kan long ha ka 16 tarik u Rymphang.
Haba phai sha ka jingïalehkai ha katei ka sngi sdang ka Black Panther ka la pynliem noh ïa ka Black Cat da 3-2 kol bad ka Puma ka la jop da 2-0 kol ïa ka Leopard. Kane ka lympung kan kut ha ka 14 tarik u Lber
