Shillong, K’lyngkot 29
Ka lympung ïalehkai U-12 bad U-14 Football League 2025-26 ba la pynïaid da ka Shillong Sports Association ka la nangjam shaphrang ha ka sngi Palei.
Ha ki jingïalehkai jong ka U-12, ka Nongthymmai Nongkynrih SC ka la pynjem khnap haduh 6-0 kol ïa ka Summit Academy bad ïa kine la thep da u R. Kharshandi ha ka minit kaba 1, 13, 15, 16, 18 & 24.
Ka Sohïong FC ka la jop da 2-0 kol ïa ka Smit SC, ka PFR ka la pynliem noh ïa ka Mawlai SC da 3-0 kol, ka Nongthymmai SC ka la shah rem da 2-3 kol ha ka Umphyrnai SC.
Haba phai sha ki jingïalehkai jong ka U-14, ka Mawtawar SC ka la shah rem da 0-4 kol ha ka Laitkyrhong SC. U R.Mylliem u la khur ïa ka hat-trick da kaba thep ha ka minit kaba 16, 25 & 57 bad u D.Rynjah (18).
Ka Shillong Lajong FC ka la ïasam mar shi poiñ bad ka Umphyrnai SC hadien ba kim shym la lah ban thep kol haduh kaba kut ka jingïalehkai. Ka Summit Academy ka la pynliem noh ïa ka Nongrah SC da 4-1 kol. ka Nongthymmai SC ka la jop da 2-1 kol ïa ka Mawlai SC.
Kane ka lympung kan bteng biang ha ka sngi Thohdieng ha kaba ka jingïalehkai jong ka U-14 kan long hapdeng ka Nongkolew SC pyrshah ïa ka Nongthymmai Nongkynrih SC, kumjuh ka Umlyngka SC ïa ka Lumshyiap SC, ka Rangdajied United FC ïa ka Smit SC, Mawkhar SC ïa ka Mawshbuit SC, PFR ïa ka Marbisu SC bad ka Mawtawar SC ïa ka Shillong Lajong FC.
