Imphal, K’lyngkot:
Ki pulit jong ka Manipur ki la kem ïa arngut ki lehnoh kiba don jingïadei bad ka kynhun Kangleipak Communist Party (City Meitei) ba la shah ñiew beaiñ bad ki la ïoh kurup ïa kawei ka kali ar shaka kaba la tuh ha ki jingkhynra ba kyrpang ha kylleng ka Imphal ha ka 28 tarik Kyllalyngkot, ong ki heh pulit.
Kawei na kitei ki jingkem ka dei ha Imphal East district, ha kaba ki bor pahara ki la ïoh kem ïa u Nongthombam Isingchaoba Singh (19 snem) uba la tip ruh da ka kyrteng kum u Kondum na Kongba Laishram Leikai Heinoubon kaba hap hapoh ka jingkhmih jong ka Porompat police station.
Une u briew u dei uba sah ha Wangkhei Wangkheimayum Leirak bad la ithuh ïa u kum u dkhot ba dang treikam jong ka kynhun KCP (City Meitei).
Ha Imphal West district ki pulit ki la ïoh ban kem sa uwei pat uba la kynnoh ba u dei u dkhot jong ka KCP (City Meitei) uba la tip kyrteng kum u Longjam Nelson Singh (22 snem) uba la tip ruh kum u Thoiba uba na Thangmeiband Hijam Dewan Leikai kaba hapoh hapoh ka jingkhmih jong ka Lamphel police station.
Ha kawei pat ka jingpyntreikam kaba la long ha kajuh ka sngi, ki pulit ki la ïoh ban kem ïa arngut ki briew kiba la suba ba ki dei ki nongkit mar na ka thaiñ Kanglapat kaba don hapoh ka thanat Imphal.
Kiba la shah kynnoh donkti ha kane ka jingjia, ki dei kiba la tip kyrteng kum u I.K.Robert (24) na Awang Khunou Mayai Leikai bad u Md. Tomba (24) na Yairipok Phouden.
Na ki kti jong ki la ïoh kurup ïa kawei ka thuk thuk TVS Centra kaba rong saw kaba don ïa u number AS-01-AA-4095, kaba la ïathuh ba la tuh kham mynshwa na ki thaiñ Kakhulong.
Ka jingtohkit kaba kham bniah ka dang ïaid shakhmat ha kaba ïadei ba ka jingjia.
