Shillong, K’lyngkot 29
U Myntri ka tnad ïalehkai u Bah Wailadmiki Shylla u la pynpaw ba ki nong-ïalehkai ka Jylla kiba wanrah ïa ki takma ha ka National Games, Asian Games, Olympics ne Paralympic kin ïoh beit ïa ka kam sorkar.
Ïa kane u la pynbna paidbah ha ka jingïalang pynkup burom ka Dorbar Shnong Raid Sawkur Nongkseh ha ka sngi Balang ïa ki rangïalehkai bad ki nongïalam jong ka Nongkseh Sports Social and Cultural Club kiba la rah ïa ka nam lahduh ha ka 11th Chief Minister’s International Gold Cup 2026, kaba la kut dangshen ha Jorethang, Sikkim.
U Bah Wailadmiki u la ong ba ha ki snem kiba la leit noh, ki nongïalehkai bad ki bahaïing bahasem kiba kyrshan ïa ki, ki la duh jingkyrmen namar ba ki nongïalehkai kim ïoh kam sorkar, hynrei ka Sorkar Jylla ka la mynjur ïa ka polisi treikam na ka bynta ki nongïalehkai ka Jylla. “Kumta kino kino ki nongïalehkai ka Jylla kiba wanrah ïa ki takma ha ka National Games, Asian Games, Olympics ne Paralympic kin ïoh beit beit ïa ka kam sorkar bad kane kan ai mynsiem ïa ki nongïalehkai bad ïa ki bahaïing bahasem ba kin ai jingkyrshan pura ïa ki”.
Ha katei ka jingïalang pynkup burom ïa katei ka kynhun la ïadon lang ruh u MLA ka Mylliem u Bah Ronnie V Lyngdoh, u President ka MFA Bah Hamletson Dohling, u President ka SSA u Bah Banteidor Lyngdoh, Bah Mairang Thangkhiew Rangbah Shnong ka Nongkseh ryngkat lang ki nongkitkam shnong bad ki paid nongshong shnong.
U Bah Shylla u la kular ruh ban shimkhia ïa ka dorkhas kaba ula ïohpdiang bad kumta yn sa ïashong pyrkhatlang bad ki nongïalam shnong ryngkat bad ki nongïalam jong ka Nongkseh Sports Social and Cultural Club ban lah ban ïarap ïa kane ka klob bad yn pyrshang ruh ban ïarap hi nalade ïa kane ka kynhun ïalehkai kaba la wanrah nam bad burom ïa ka jylla baroh kawei.
Ha kawei pat ka liang u Bah Ronnie ula pynpaw ïa ka jingkmen ba ka NSSCC ka la jop ïa ka lympung ïalehkai ha Sik-kim bad khamtam haba kiba bun ki dei ki samla Khasi suda bad ula ïaroh ia ka jingshimkhia u Bah Daniel Thangkhiew uba la ïalam ïa kane ka klob ban kynjoh ïa ka jingjop shabar ka jylla bad kyrmen skhem ba un ïai bteng ban ïalam ïa ka klob ban pawnam ruh wat ha ka dewbah Asia.
U Bah Hamletson Dohling bad u Bah Banteidor Lyngdoh ki la ai jingïaroh ïa ka Nongkseh Sports Social and Cultural Club hapoh ka jingïalam u Bah Daniel Thangkhiew ba kane ka klob ka la kiew shaphrang bad ka jingjop jong ki dangshen ha Sikkim ka la wan rah nam bad burom ïa ka jylla bad ïa ka jaidbynriew.
Haba batai shaphang ka jingïaid lynti kane ka klob, u President ka NSSCC u Bah Daniel Thangkhiew u la ong, ba hapoh ka jingïalam u Coach u Bah Richardson Nongneng ki la jop 3 tylli ki nam lahduh kata ha ka First Division Football League, ka Champions Cup kaba la pynïaid da ka SSA bad kaba kham kyrpang ka dei ha ka Chief Minister’s International Gold Cup 2026 kaba ki la ïakhun shabar na ka jylla.
Ula ong, ba ki nongïalehkai kiba la ïalehkai na ki klob kiba heh ki la wan ban ïalehkai noh na ka Nongkseh ha ka First Division bad kine ki la wan ym na ka bynta ka pisa, hynrei namar ka jingïeid ïa ka phutbol bad ban kyntiew ïa ka Nongkseh.
