Shillong, K’Lyngkot 29
Ka Meghalaya ka la mad ïa ka nam rem ba nyngkong jong ka ha ka jingïakhun kaba saw ha ka lympung ïalehkai National Football Champion -ship na ka bynta ka Santosh Trophy 2025-26, hadien ba ka la shah pynliem da 3-0 ha ka Kerela ha ka sngi Palei ha Silapathar, Assam.
Ïa kine ki lai kol jong ka Kerala la thep da u Arjun V (36), Muhammed Riyas Pt (71) bad Muhammad Ajsal (85) na ka bynta ban ïai bteng ban bat ïa ka kyrdan ba hakhlieh na ka Group-B bad ruh ban long ka kynhun kaba nyngkong eh ban jam sha ka quarter final.
Hynrei kane ka nam rem ka la pynlong ïa ka Meghalaya ban dangïai neh ha ka kyrdan balai hadien ba ka la ïoh ba kan khur 5 point, hynrei kaei kaba donkam pat ïa ka Meghalaya ka long ba ka donkam ban ïalehkai bha ha ka jingïakhun kaba khatduh pyrshah ïa ka Railways ka ban sa long ha ka sngi Saitjaiñ.
Na bynta ka jingïakhun ba mynta ka sngi, u coach ka Meghalaya u Bah Khlaiñ Pyrkhat Syiemlieh u la wanrah lai tylli ki jingkylla ha kaba u Wanboklang Lyngkhoi, Marbiangki Suchiang bad u Fairming Suting ki la ïoh ban ïalehkai naduh kaba sdang ha ka jaka jong u Mebanaibok Kharbud-nah, Dibormi Kassar bad u Dawan -chwa C Challam.
Ha kane ka jingïaid lynti ka Meghalaya ha kane ka lympung ka long ba ka la jop ïa ka Odisha, bad hadien kane ka la ïakhaid pyrshah ïa ka Punjab bad kumjuh ïa ka Services hashwa ba kan shah rem ha ka Kerala.
Ka kol ba nyngkong ba ka Kerala ka la ïoh ba kan thep ka long hadien ba ka bol kaba u Arjun u la shut lyngba ka free-kick ka la ïaid lyngba ki rangïalehkai ‘dien ka Meghalaya bad ha kaba kut ka la rung hi jlang sha kol. Ïa ki kol kiba sah pat ki wan ha ka kylla miet, kaba hangne la shem bad ïohi ba ki rangïalehkai ‘dien ka Meghalaya kim shym la lah ban shan tyngeh na ka jingshah thep.
Kumba ba ka long mynta ka Meghalaya ka sah satang kawei ka jingïakhun bad ka donkam ban khur ïa ki lai poiñ bad ha ka juh ka por kan hap ban ap na ka jingmih jong ka kynhun ïalehkai ka Punjab bad ka Services, ha kaba ka Punjab kan ïakhun pyrshah ïa ka Odisha. Katba ka Kerela kan ïakhun pyrshah ïa ka Services.
