Shillong, K’lyngkot 29
Ka kynhun ki 23 ngut ki ‘thei ïalehkai ka India ka la mih ban leit sha Pokhara, Nepal ban ïashim bynta ha ka SAFF U-19 Women’s Championship 2026, kaba la buh ban long naduh ka 31 tarik mynta u bnai haduh 7 tarik u Rymphang.
Ha kane ka kynti kaba mynta ka India ka la sei da ka kynhun ïalehkai U-17 namar ka dangdon ha ka jingpynkhreh na ka bynta ka AFC U-17 Women’s Asian Cup China 2026. Te kumta ka ‘thei ïalehkai ka Jylla ka Alisha Lyngdoh ka la paw ha kane ka thup, hynrei ka Bonifilia Shullai kam shym la don ha kane ka thup ïalehkai kaba mynta.
Ha katei ka lympung ka India hapoh ka jingïalam ka Pamela Conti kaba na Italy, kan ïakhun pyrshah ïa ka Nepal ha ka 31 tarik mynta u bnai, kumjuh ïa ka Bangladesh ha ka 2 tarik u Rymphang bad ïa ka Bhutan ha ka 4 tarik. Ïa kine ki jingïalehkai yn pynlong ha Pokhara Stadium.
Ki kyrteng ki 23 ngut ki ‘thei ïalehkai ka ri India
Goalkeeper: Munni, Shelna Maria Sajit & Surajmuni Kumari.
Defender: Akashi Naik, Alena Devi Sarangthem, Alisha Lyngdoh, Binita Horo, Divyani Linda, Elizabed Lakra, Joyshini Chanu Huidrom & Taniya Devi Tonambam.
Midfielder: Abhista Basnett, Alva Devi Senjam, Anita Dungdung, Julan Nongmaithem, Pritika Barman, Redima Devi Chingkhamayum, Shveta Rani & Thandamoni Baskey.
Forward: Anushka Kumari, Anwita Raghuraman, Pearl Fernandes & Valaina Fernandes.
