Shillong, K’Lyngkot 29
Ka sorkar jylla ka la pan jingïarap pisa haduh T.100 klur na ka Sorkar Pdeng na ka bynta ban pynlong ïa ka 39th National Games ha u snem 2027.
Ha ka jingthoh ba la ai sha u Myntri Rangbahduh ka ri u Narendra Modi ha ka sngi Palei, u Myntri Rangbah ka Jylla u Conrad K Sangma u la ong, “Ka Jylla ka la pan T. 100 klur kum ka jingïarap pisa na ka tnad ïalehkai jong ka Sorkar Pdeng na ka bynta ban kyrshan ïa ki jingpynkhreh kiba ïadei bad ki jingïalehkai, ki jingtreikam bapher bapher kiba long ka jingkitkhlieh kum ka nongpdiang ïa katei ka lympung.”
“Ka Jylla ka tyrwa ban pyntreikam ïa ka rukom ai jingïarap kaba shisien, kaba la buh lypa na ka bynta ki jylla ki ban pynlong ïa ka National Games, ka ban sdang naduh ka 39th National Games, ban lah ban pynurlong ïa ki jingtreikam ha ka por kaba biang, bad kiwei kiwei,” u la bynrap.
U Sangma u la ban jur ruh ba ka jingpdiang jong ka Meghalaya ïa ka 39th National Games ka ban long ha u snem 2027 ka dei u mawjam ba kongsan ha ka ri, kaba wanrah ïa ka lympung ïalehkai kaba heh duh jong ka ri ha ka thaiñ shatei lammihngi bad ban pynbiang ïa ki jingtei bad jinglah ban pynlong ïa ki jingïalehkai.
U la pyntip ba ka Jylla ka la bei tyngka kumba T. 1,000 klur naduh ba la soi ïa ka Host City Contract, da kaba thaw 200 tam ki jaka ïalehkai ha kylleng ki jaka, bad ka la khreh ban pynlut sa tyngka sa T. 1,900 klur ha ki lai snem ki ban wan.
“Ha u snem 2028, ka Jylla kan ïoh kumba 500 tylli ki jaka ïalehkai ha kylleng ki block, ki distrik, bad ki jaka pdeng jong ka Jylla kynthup ïa ka madan ïalehkai phutbol kaba heh tam ha India, ka jaka ïalehkai kinglieng ne ka slalom ba nyngkong eh ha ka Jylla, bad ki jaka ïalehkai jngi (aquatics) bad ka jaka ïalehkai gymnastics,” bynrap u Sangma.
Halor ka jingïohi jngai na ka 38th National Games, u Myntri Rangbah u la pynbna ba kin sa don kiwei pat ki jait jingïalehkai ha ka 39th National Games yn pynlong ha kylleng ki jylla jong ka thaiñ shatei lammihngi jong ka ri.
“Ka Meghalaya kan bei tyngka ïa baroh ki jinglut – ka jaka sah, ka bam, ka leit ka wan, ka jingpynïaid ïa ki jingïalehkai, bad ka jingpynkhreh ïa ka madan ïalehkai – ha kylleng ki jaka ïalehkai, da kaba pynkiew ïa ka mang na kane ka lympung ka ban long haduh T. 400 klur,” u la bynrap da kaba ong ba ka Jylla ka la kyntu ban ïoh ka jingkyrshan na ka Sorkar Pdeng.
