Shillong, K’Lyngkot 30
Kum shi bynta ka jingpdiang ban pynlong ïa ka lympung bah ïalehkai ba heh tam ka National Games, u myntri ba dei khmih ïa ka tnat Sports & Youth Affairs u Bah Wailadmiki Shylla, u la leit ban ai ïa la ka kaiphod kaba pura ka jong u sha u Symbud Myntri Rangbah jong ka jylla, ban batai sani ïa ka jinglong ba la pynkhreh ka sorkar ban pynlong ïa kane ka lympung.
Haba ïadei bad kane, na ka liang u bah Wailadmiki haba ïakren bad ki lad pathai khubor, hadien ba la wai kane ka jingïalang u pyntip ba la ïoh ban batai ha u Symbud Myntri Rangbah ïa ki kam ba ïadei bad ki jingtei ïa ki jaka pynïalehkai, ki jaka ban pynshong pynsah ïa ki nongwan ïalehkai bad kiwei-kiwei.
Nalor kata u pyntip ba la batai ha u Symbud Myntri ïa ki jingpynkhreh ïa ki kam kiba ïadei bad ban pynlong ïa ki katto katne ki jingïalehkai kum ha Jowai, Shillong bad Tura, ha kaba u la kam ba na ka liang ka jong u shimet, dang ha ka taïew kaba la dep u la hiar ban jurip hi dalade ïa ka jingpyntrei ïa ka JN Complex, ka indoor hall, ki pung jngi ne ka aquatic stadium ba thmu ban tei ha nongbah Shillong ba thymmai (New Shillong) bad u la hiar ban jurip ruh sha sorbah Tura ha kaba u la leit ïuh kjat ha PA Sangma Stadium.
Haba ïadei bad ka Games Village, kaba hangne la sngewthuh ba ka sorkar ka thmu ba kan pynsah ïa ki nongwan ïashim bynta ha ki ïing basa (hotel, homestay).
Shuh-shuh u pyntip ba tang ha kine ki khyndiat sngi ba la leit, na ka liang u myntri ka sorkar kmie ba dei khmih ïa ka tnat sports u la lum ïa ka jingïalang ba la leit ban mihkhmat ïa ka Jylla da u Commissioner Secretary bad ban ïashim bynta lang nangne napoh ka jylla lyngba ka Virtual Meeting, bad ha kane ka jingïalang u myntri ka sorkar kmie u pynpaw ïa ka jingkmen ïa ka jingïaid ki kam pynkhreh ka jylla ban pynlong ïa kane ka lympung.
Haba ïadei bad ka jingkwah ka sorkar kmie ban ïarap ban pynlong lem ïa kane ka lympung bad kiwei pat ki jylla ka thaiñ Shatei Lam Mihngi, ha kaba ka soskular jong ka host city kan dei beit ka nongkynti ka jylla Meghalaya.
Haba ïadei bad kane, u Bah Wailadmiki u pyntip ba haduh mynta dei tang ka jylla Assam ka bym pat shym la jubab ne pynpaw ei-ei na ka liang ka jong ka lehse ïoh ba imat ka dang bunkam ban pynkhreh ïa ka election ka jong ka.
