Shillong, K’Lyngkot 30
U Djokovic u la ïaleh pyrshah ïa shibun ki jingeh ha kane ka jingïakhun wat ha ka rta kaba 38 snem ban pynliem noh ïa u Jannik Sinner, ha ka jingïalehkai semi-final kaba la long ha ka Rod Laver Arena.
U Novak Djokovic, u la ïoh ban jop ïa u Jannik Sinner, ha ka semi-final jong ki shynrang jong ka Australian Open 2026, ha ka sngi Thohdieng, ban rung sha ka phainal kaba 11 jong ka Australian Open ha ka jingim jong u. U Djokovic, uba la jop shiphew sien ha ka Australian Open, u la lah ban wanphai biang ha kane ka jingïalehkai na ka jingshah lamkhmat kaba ar sien pyrshah ha u Sinner bad pynliem noh syndon ïa u, u Sinner uba dang ïai jop mynta da 3-6, 6-3, 4-6, 6-4, 6-4. U Sinner uba don ha ka kyrdan ba ar ha ka pyrthei u la jop ïa ka set kaba nyngkong bad kaba lai, hynrei u Djokovic uba don ha ka kyrdan ba 4 ha ka pyrthei u la pyni ïa ka jingtbit bad ka jinglah ban ïakhun man ka por ha ki jingïalehkai ban wanphai biang. Kane ka dei ka jingjop kaba nyngkong jong u Djokovic ïa u Sinner hadien ar snem tam. Une u nongïalehkai un ïakhun pyrshah ïa u Carlos Alcaraz, u rangïalehkai na Spain ha ka phainal, hadien ba u la wanphai na ka jingmynsaw, da kaba pynliem ïa u Alexander Zverev kham mynshwa ha ki jingïalehkai ba la dep.
