Srinagar, Rymphang:
Ka kynhun National Investigation Agency (NIA) ha ka lah sngi U Blei ka la pynlong ïa ka jingtalasi ha ki bun tylli ki jaka ha ki distrik Srinagar, Bandipora bad Baramulla ha Jammu & Kashmir ha kaba ïadei bad ka jingjia ba ïadei bad ki kam pyntriem.
Kumba la ïathuh da ka lad pathai khubor, la ïathuh ba ïa kane ka jingtalasi la pynlong ha Rafiabad, Sopore, Bomai (ha Baramulla distrik), ha ka thaiñ Bandipora, bad ha ka thaiñ Parimpora jong katei ka nongbah, la ïathuh ki heh sorkar.
Ha ba sdang jong u bnai Kyllalyngkot, ki kynhun shipai pahara ha ka thain Kishtwar jong ka Jammu & Kashmir, ki la pynjlan ïa ka jingkhynra hadien ka jingïasiat kaba thymmai ha ka thaiñ Chatroo kaba la tap da ka ïor, ha kaba ar haduh lai ngut ki lehnoh kiba don jingïadei bad ka kynhun JeM ki la lait phet. Kumba la ïathuh da ka lad pathai khubor, la ong ba kane ka dei ka jingïasiat ha ka sien kaba lai tang ha ka shi taïew.
Ki bor ba dei khmih halor ka jingpyntreikam, ki la ong, “Ka jingïasiat ka la jia ha ka jaka khlaw Janseer-Kandiwar kaba la tap da ka ïor ha Chatroo ha ka por 10:20 baje mynmiet jong ka 25 tarik u Kyllalyngkot hadien ba kawei na ki kynhun wad bniah kaba la pynlong da ki shipai bad ki pulit ka la peit bniah ïa ka jingleit jingwan jong ki lehnoh kumba la pyntip da ka lad phah khubor hadien ka jingïohlum jingtip ba kine ki briew ki dei ki lehnoh.
Shuh shuh ki heh ba dei khmih ki la pyntip, shaphang katei ka jingjia ka la pynskhem ba ka jingïasiat kaba markylliang hapdeng ki arliang mamla ka la bteng la katto katne por, hynrei ki lehnoh, kiba la ngeit ba ki la don arngut ne lai ngut, ki la lah ban phet krad noh.
Kane ka dei ka jingïasiat ha ka sien kaba lai ha ka thaiñ Chatroo jong ka distrik kaba don ha ka jaka lum, ha ka taïew ba la lah, hapdeng ka jingkhynra kaba jur na ka bynta ki lehnoh ba la buhrieh ïalade ha kaba la ong ba kine ki don ka jingïadei bad ka kynhun lehnoh Jaish-e-Mohammad (JeM).
Kham hashwa ha ka 18 tarik, Kyllalyngkot, ka la don ka jingïasiat kaba jur bha ha ka shnong Sonnar hajan Mandral-Singhpora kaba la pynïap ïa uwei u shipai bad pynmynsaw ïa kiwei pat ki hynñiew ngut ki shipai.
