Chandigarh, Rymphang:
Ha ka por ba la sam ïa ki shithi thung kam sha ki 916 ngut ki samla shynrang bad kynthei na ki tnad bapher bapher ha Mohali ha ka sngi Balang, u Myntri Rangbah ka Punjab u Bhagwant Singh Mann u la ong ba kane ka jingpyntreikam ka pyni ïa ka jingshimkhia jong ka sorkar AAP ban pynpoi ïa ki kam sorkar khlem ka jingai pisa ne ka jingleh shiliang khmat, hapoh ka jingtreikam jong ka’RozgarMizgar’.
Da kaba kdew ba 63,943 ngut ki samla ki la dep ban shah ai kam sorkar tang katkum ka jinglah jong ki, u Myntri Rangbah u la pynskhem ba ka jingaiti ïa ki shithi thungkam kan dang bteng ha ki sngi ban wan, da kaba pynïapher ïa ka bad ki sorkar barim ha kaba ïa ki kam la rai da ka jingai jingmut bad ka jingai pisa ym da ka jinglah.
Haba ïasam ïa ki katto katne ki bynta na ka jingïalang ha ka rynsan X, u Singh u la ong: “Mynta ka sngi ha Mohali, la sam ïa ki shithi thungkam sha ki 916 ngut ki samla shynrang bad kynthei na ki tnad bapher bapher.
La ai jingkyrkhu kyrdoh ïa ki ban shakri ia ka Punjab bad ki briew jong ka da ka jingaiti lut bad ka jinglong ba janai. Haduh mynta ki don 63,943 ngut ki samla kiba la ïoh kam sorkar khlem da ai pisa ne ai jingmut. Ha ki sngi ban wan ruh kumjuh, ka jingpyntreikam ban aiti ïa ki shithi thungkam sha ki samla hapoh ka ‘Mission Rozgar’ kan ïai bteng khlem jingthut.”
Haba kren ha ka jingïalang ha Vikas Bhawan ha ka por ba sam ïa ki shithi thung kam sha ki samla ba dang shu shah thung kam, u Myntri Rangbah u la ong ba da ki phew snem, ki lad ki lynti kiba dei hok jong ki samla shynrang bad kynthei jong ka jylla ki la shah ktah ha ki bahaïing hasem bad ki paralok ba jan jong kito kiba don ha ka bor synshar.
“Kham mynshwa, ïa ka hok jong ki samla Punjab la knieh noh da kiba jan bad kiba ïeid eh jong kito kiba don ha ka bor. Ki martyr ba pawnam kum u Shaheed-e-Azam Bhagat Singh bad kiwei kiwei ki dei ban sngewsih jur ba wat hadien palat 70 snem ka jingïoh ïa ka jinglaitluid, ki jingangnud jong ki kim shym la urlong.”
U Myntri Rangbah ka jylla u la pynskhem ba naduh ba u la shimti ïa ka kam, ka sorkar jong u ka la ïaleh beit ban pynurlong ïa ki jingangnud jong ki riewshlur ba khraw jong ka ri.
“Ki sorkar barim ki la lute ïa ka pisa kaba la thmu na ka bynta ka pule puthi bad wat na ka bynta ki kam ki jam ruh.Ka sorkar jong ngi ka la plie lad ïa ki kam sorkar na ka bynta ki samla”, la ong u Myntri Rangbah da kaba bynrap ba ki samla kiba la ïoh kam sorkar ha kine ki saw snem ki la don haduh 63,943 ngut.
Haba khot ïa kane ka sngi kum ka por ba kongsan na ka bynta ki nongwad kam ba dang shu shah thung thymmai, u Mann u la ong, “Mynta ka sngi ka dei ka sngi ba la buh da ki shithi rong saw na ka bynta kine ki samla kiba la ïoh kam ha ki tnad bapher bapher.Ka sorkar Punjab ka la ïaid lait ïa ka jingkheiñ ban ai palat 63,000 tylli ki kam sorkar ha ka rukom kaba shai pura.” Ha ka jingïapher, u la ong ba ka sorkar pdeng ka ai skhim da ki kyndon kiba ym don jingmyntoi ei ei ïa u paidbah ba rit paid.
Haba pynpaw ïa ki jingthmu jong ka bha ka miat jong ka jylla, u Myntri u la pynskhem ba ka sorkar Punjab ka la sdang ïa ka ‘Mukh Mantri Sehat Yojna’, ka prokram pynbha ïa ka koit ka khiah kaba heh tam jong ka jylla. “Mynta kawei pa kawei ka longïing kan ïoh haduh T.10 lak ka jingsumar khlem pisa.Mynshwa ka jingbuhdor ka long T.5 lak, kaba mynta la pynkiew ar shah. Kumba 65 lak tylli ki longïing kin ïoh jingmyntoi na kane ka skhim kaba thmu na ka bynta ka jingbha jingmiat jong man la ki bynta jong ka imlang sahlang,” u la ong.
U la ong shuh shuh ba ka sorkar jylla ka la khang 19 tylli ki jaka thep bai lutksan ha Punjab, kaba la pynim T.64 lak man ka sngi na ka pla jong ki riew paidbah. “Ban pynthikna ïa ka jingsumar pang kaba lah ban ïoh, la plie ïa ki 881 tylli ki Aam Aadmi Clinic ha kylleng ka jylla, kiba ai jingsumar bad ki dawai khlem jingsiew.
U Myntri Rangbah u la ong ba ka Punjab ka la ïoh pateng ïa ka pateng kaba riewspah na ki riew khraw ha ka jingïalehkai, ki heh shipai, ki riew lehbha bad kiwei kiwei kiba la shakri ïa ka jaitbynriew da ka syep bad ka snam jong ki. “Ka sorkar jong ngi kam iehnoh ïa u mawsiang na ka bynta ka jingbha jingmiat jong man la ka bynta jong ka imlang sahlang lyngba ki lad ki lynti kiba kyrshan ïa ki paidbah bad kiba ïadei bad ka roi ka par. Ka jingbym don kam don jam ka dei ka daw tynrai jong ki katto katne ki jingeh ha ka imlang sahlang, bad dei na kata ka daw ba ngi pynleit jingmut ban pynduh jait ïa ka,” u la ong.
Haba pynkynmaw biang ïa ka jingkular jong ka sorkar ban thung kam da kaba shai, u Bhagwant Singh Mann u la ong ba baroh ki kam kiba lait la pyndap kloi lyngba ka rukom treikam kaba khlem jingbakla. “Ym shym la don wat tang kawei ka jingthung kam na kine ki jan 64 hajar tylli ki kam ba la tuklar ha kano kano ka iingbishar.
Ka long ka por kaba sngew sarong ïa ka sorkar Punjab ba ïa kine ki kam baroh la ai tang halor ka nongrim jong ka jingtbit”, u la ong.
Haba batai ïa katei ka jinglehkmen kum kaba kongsan, u Myntri Rangbah u la ong ba ki samla kiba dang shu shah thung thymmai mynta ki dei shi bynta jong ka longïing sorkar Punjab. “Ha ka sien kaba nyngkong ha ka histori jong ka jylla, ka sorkar ka la ai ïa ka rekod palat 63,000 tylli ki kam tang hapoh saw snem. Baroh ki jingthung kam la leh katkum ka jingbit jingbiang, khlem ka jingbamsap ne ka jingsngew shiliang.
U la ong ba ka koit ka khiah, ka pule puthi, ka bor ding, ka um, ki jingtei bad ka suk ka saiñ ki dei ki mat ba kongsan tam jong ka sorkar jong u. “Ngi pynthikna ïa ka roi ka par kaba pura . Nga kyntu ïa ki samla ba kin pyndep ïa la ka kamram da ka jingaiti lut ha ka kam bad ban pyndonkam hok ïa ka pen jong ki ha ka jingshakri ïa ki paidbah,” ong u Mann.
Katba haba ïathuh ïa ki jingshem jong ki, ka Dr Pooja kaba dang shu thung thymmai na Roopnagar ka la ong ba ka dei ka kabu kaba khraw ïa ka ban long shi bynta jong ka sorkar jylla. Ka Jasanpreet Kaur na Mukatsar Sahib ka la ai khublei ïa u Myntri Rangbah ka jylla na ka bynta ka jingpynrung kam, da kaba ong ba ka sorkar ka la ai ki lad ki lynti kiba shisha ïa ki samla ban pynshisha ïalade.
U Dr Damanpreet Kaur na Amritsar u la ong ba ka burom baroh na ka bynta ka rukom thungkam kaba laitluid bad kaba hok ka leit sha ka sorkar jylla. “Ha ka sien kaba nyngkong, ki jingkular ba la ai sha ki paidbah ki la urlong. Ïa ka jingpynrung kam la pynlong tang katkum ka jinglah, kaba ailad ïa ki samla kiba dei hok ban ïoh ïa ka lad kaba biang”, ka la ong.
U ophisar jong ka Veterinary u Dr Kamalpreet Singh na Moga u la ong ba ka sorkar ka dang pyndap ïa ka jingïapher hapdeng ka tnad ri mrad bad ki nongrep. “Nga la ïoh ïa kane ka kam tang namar ka jinglah jong nga lyngba ka rukom treikam kaba khuid. Tang ka jingtrei shitom ka la sei soh”, u la ong.
Ka Cooperative Inspector ka Jaspreet Kaur ka la ong ba ka la ïoh ïa ka kam sorkar kaba ar khlem kano kano ka jingsiew pisa ne jingai jingmut bad ka la kular ban trei ïa la ka kamram da ka jingaiti lut.
Ha kane ka sngi la ïa donlang ki Myntri ka kynhun Myntri u Dr Balbir Singh, u Gurmeet Singh Khudian bad kiwei kiwei.
