Ranchi, Rymphang:
Kumba la pynshisha, la ong ba ki la don kumba 14 ngut ki nongtrei bylla na ki distrik bapher bapher jong ka Jharkhand kiba mad ïa ki jingeh ba la pynshisha ba kim shym la ïoh ïa ka bainong ba ki dei ban ïoh hadien ba ki la trei ïa ka kam ha Dubai, kiba la ujor sha ka Sorkar Jylla ba kan ïarap ïa ki ban wanphai biang da kaba suk sha ka ri, ong uwei u heh sorkar ha ka lah sngi U Blei.
Ka nongïalam ka kynhun jong ka State Migrant Control Cell, ka Shikha Lakra ka la ïathuh ha ki lad pathai khubor ba ki la ïoh jingtip shaphang ki 14 ngut ki nongbylla na Giridih, Hazaribag bad Bokaro distrik kiba la phah ïa ka video da kaba kynnoh ba katei ka kompeni shimet kam shym la siew bai bylla bad ki pynbor ruh ban trei palat por.
“Kane ka buh jingeh ïa ki ha ka liang ka jaka sah bad ka bam. Ki nongbylla kiba sahkut ki la phah ïa ka durkhih kaba ïasam ïa ka jingeh jong ki bad kyrpad ïa ka sorkar ban ai ki lad jingïarap. Ki la phah ïa ka durkhih sha u Sikandar Ali, uba trei na ka bynta ka bha ka miat jong ki nongbylla sngi,” la ong ka Lakra.
“Ngi dang pyrshang ban ïakren bad ki nongbylla sngi bad ban pynshisha ïa ki kot ki sla jong ki ban sdang ïa ka jingïakren bad ka Indian Embassy bad ki heh sorkar UAE na ka bynta ban pynphai biang ïa ki nongbylla sngi da kaba suk,” ong une u heh sorkar.
U nongïakhih ha ka imlang sahlang u Sikandar Ali u la dawa na ka sorkar pdeng bad ka sorkar jylla ban shim ïa ki sienjam kiba skhem na ka bynta ka jingwanphai biang jong ki nongbylla sngi kiba sahkut ha katei ka jaka.
“Ki nongbylla sngi ha ki por ba la leit noh ruh ki la shah pyndik shabar ri, bad da ka jingeh kaba khraw, la pynpoi noh ïa ki sha la ïing. Watla katta ruh ki nongbylla ki dang ïai bteng ban leit shabar ri ban kamai jakpoh,” ong u Ali.
Ki nongtrei kiba sahkut ha Dubai ki kynthup ïa u Roshan Kumar bad u Ajay Kumar (baroh arngut ki dei na Sariya ha Giridih), u Rajesh Mahato bad u Ajay Kumar na Bagodar kaba don ha Giridih, u Daleshwar Mahato na Penk Narayanpur ha Bokaro, u Jageshwar Mahato bad u Phalendra Mahato na Khedadih, u Baijnath Mahato na Siraiya, Dilip Mahato, Gangadhar Mahato, Triloki Mahato, Deepak Kumar na Basariya, Rohit Mahato bad u Seva Mahato na Gorhar (kine baroh ki dei na Hazaribag distrik).
