Ki rukom lehniam kum ki jingïaseng bad ki jingdwai. Kim lah ban ai jingshngain bad pyllait ïa ngi na ka jynjar bad ka khuslai. Namar tang shisien ngin ïap, lada ngi long kiba hok ne kiba pop ruh. Namar ka ktien U Trai lyngba u Amos u Nongïathuhlypa ka ong, kordit ïa phi kiba kwah ïa ka sngi U Trai, namar balei phi kwah ïa ka sngi U Trai, ka long ka jingdum, te ym ka jingshai.
Bad ka ong ruh nga isih nga ibeiñ ïa ki jingkhawai niam jong phi bad ngan ym sngewbha satia ïa ki jingïaseng ba kyrpang jong phi (Amos 5 : 18 – 21). Ka jingduwai bad ki jingïaseng kim long eiei ruh em, haba ka dohnud jongngi ka dap da ka bishni ka pihuiñ, ka khong khong, ka hangamei bad ka thok ka shukor para briew. Ka jingrakhe ïa ka khristmas ruh kam dei tang ka jingpynitynnad ïa ka dur rongphong ba kynja pyrthei.
Ka jingrakhe ïa ka khristmas ka long kaba khuid na U Blei tang lada ka dohnud jongnga jongphi ka don ka mynsiem sngewlem bad ïa ieit para briew, khamtam ka dohnud ka dei ban long kaba sngur ym kaba dap da ka mynsiem bihni pihuiñ para briew.
Namar watla ngi riewspah katno katno ruh em ngin ym lait na ka jingïap kaba beh thong ïa ngi ki briew nangne na sla pyrthei. Uwei pa uwei u riewspah ne uba duk u dei ban ïap shisien ka sngi. Kane kan jia ha ngi ki briew wat la ngi khraw ne ngi rit ruh ym don ba lait na ka sngi jong ka jingïap.
C. B. Iawphniaw
