Kolkata, Rymphang:
Ka jingkynnoh jong ka Myntri Rangbah ka Bengal, ka Mamata Banerjee, pyrshah ïa ka jingpynkylla ïa ka thup kyrteng jong ki nongthep vote, ka la nang jur katba nang jan ka ilekshon ha katei ka jylla. Mynta ka kynti, ka la kynnoh ba ka Election Commission ka la pyndam noh da ka mon lajong ïa ki kyrteng jong ki nongthep vote, da kaba kynnoh ba tang ha ka konstitwensi jong ka kane ka la jia, la pyndam haduh 40 hajar tylli ki kyrteng khlem ka jingbishar bniah.
“Ha ka konstitwensi jong nga ki la pyndam noh ïa ki kyrteng jong ki 40 hajar ngut ki nongthep vote da kaba leh shiliang… Kata kaba la khot ka Seema Khanna, kaba don ïa ka jingmut jingpyrkhat jong ka BJP, ka pyndam noh ïa ki kyrteng katba ka dang shong ha ophis jong ka kynhun EC… Wat u nongpynïap briew ruh u ïoh lad ban ïada ïalade,” ka la ong.
“Ka kynhun Seema Khanna ka la leh ïa kane. Kim lah ban leh, ka long kaba be-aiñ. Ki la don kumba 58 lak tylli ki kyrteng ïa kiba la pyndam noh da kaba paw ba ka la don ka jingleh shiliang,” ka la bynrap. Haba kynnoh ba ka BJP ka thung beaiñ ïa ki “micro-observer”, ka la ong “Kim don kano kano ka kyrdan ha ka RP Act bad ki dei ki briew jong ka BJP kiba la thung na sha lyndet”.
Nangta ha ka rukom kaba sngewtynnad, ka la khot ïa kito kiba la pyni ba ki la ïap ha ki thup kyrteng ba kin rah ïa ki kti jong ki. “Peit, ki dang im hynrei katkum ka Election Commission ki la ïap,” ka la bynrap.
Da kaba kynnoh ba ka Commission ka pyndam ïa ki kyrteng ha ka kyrteng jong ka “logical discrepancy”, ka la ong ba wat ïa u nongjop Nobel, u Amartya Sen, u la shah khot hajir halor ka jingpyntikna ïa ka rta jong ka kmie jong u.
“Nga pynibor ïa ki ban ïaleh pyrshah ïa ngi ha ka saiñ pyrthei bad ka synshar paidbah. Ka seng jong ngi ka khlaiñ, ngi tip ïa kaei kaba jia,” ka la ong. Haba kylli biang ïa ka jingthmu jong ka jingpyntreikam, ka la ong, “Ngam don jingeh bad ka SIR, hynrei balei ban leh ïa ka ha ka sngi shuwa jong ka ilekshon. Balei ym hadien ka ilekshon?”
