New Delhi, Rymphang:
Ki la don kumba 8 ngut ki MP ka seng Congress, kiba la shah beh bad shah pynsangeh shipor ban leit sha ïingdorbar ha u Lamphang ka Lok Sabha, ha ka sngi Ba-ar, namar ka ‘jingleh khlem akor’ ha ka ïing dorbar, halor ka jingkyntait ban ailad ïa u nongïalam ka liang pyrshah, u Rahul Gandhi, ban sot ïa ki kyntien na ka ‘jingkynmaw’ jong u heh shipai barim, u M.M. Naravane.
Ki dkhot kiba shah weng ki kynthup ïa u Gurjeet Singh Aujla, u Hibi Eden, u C Kiran Kumar Reddy, u Amarinder Singh Raja Warring, u Manickam Tagore, u Prashant Padole bad u Dean Kuriakose (baroh ki dei na ka Congress) bad u S Ventakesan (CPI-M), hadien ba la kynnoh ba ki la bret ïa ki kot ban poi sha ka jaka shong jong nongpynïaid jong ka dorbar.
Haba wanrah ïa ka rai ban phah weng ïa ki, u Rijiju u la ong ba ki dkhot ki la leh khlem da kheiñ snep ïa ka ïingdorbar bad ïa ka bor jong u Chairman. Ka ïingdorbar ka la mynjur ïa ka rai da ka jingthep vote da ka sur, hadien kata la pynsangeh noh ïa ka jingïatai na ka bynta ka sngi hapdeng ka jingkulmar.
La pynsangeh noh ïa ka dorbar ha ïingdorbar Lok Sabha, na ka bynta katei ka sngi, hapdeng ka jingkhihwin. Ki nongmihkhmat jong ka seng Congress, hapoh ka jingïalam jong u Rahul Gandhi, ki la ïakhih shabar jong ka ïingdorbar pyrshah ïa kitei ki jingshah weng shipor jong ki dkhot ka seng.
Ki MP ka liangpyrshah ki la ïakhih pyrshah ïa ka jingkyntait jong u Lamphang ïa u Rahul Gandhi ban kren halor ka ‘jingkynmaw’ ba khlem pat pynmih paidbah jong u heh shipai barim u M.M. Naravane, ha kaba u la pynlong kam saiñ pyrthei ïa ki jingthoh kiba ïadei bad u Myntri Rangbahduh u Narendra Modi, u Myntri ka tnat ki kam pohïing jong ka sorkar pdeng u Amit Shah bad u Myntri ka tnat ïada ri u Rajnath Singh.
Ha ka step jong ka sngi Ba-ar, u Gandhi u la pynshisha ïa ka kopi jong kawei ka jingthoh kaba la kdew ïa ka ‘jingkynmaw’ jong u Naravane kaba khlem pat pynmih bad ong, “Kane ka dei ka pdeng jong ka jingkren jong ka President jong ngi. Kaba nga ong ka long tang ba ngan ai ïa ka jingkren shaphang kaei kaba la jia hapdeng ka China bad ka India bad kumno u Myntri Rangbahduh jong ngi u la leh ïa kane. Balei la khang ïa nga?”
U Krishna Prasad Tenneti, uba dei u Chairman jong ka ïingdorbar, u la kyrpad ïa u, ba un wanrah ïa ka ha ka miej ïakren bad ong “ngin sa khmih bniah ïa ka bad ngin sa ïoh pat.” Yn ym shah shuh ïa u Rahul Gandhi ba un kren, ha kaba kane ka la pynlong ïa ki MP jong ka seng Congress ba kin pynlong ïa ka jingïakhih.
