Moscow, Rymphang:
Ka Russia ha ka Sngi Balang ka la bthah ia ka Ukraine ba ka dei ban pdiang ia ki jingdawa jongka lada ka kwah ban pynkut noh shi syndon ia ki jingiakynad bad ka Russia, lem kumta, la ong ba ka Russia kan ïaid sha khmat ban thombor bad pynjot thiaw ia ka Ukraine da kaba kham tyngeh shuh-shuh ha kine ki sngi ban wan.
Ka jingïakren ba la pynïaid da ka US, ka dei ka sien ba khatduh eh jong ka jingïakren ha ka jingïakynad kaba haduh mynta kam shym la lah ban ïoh ïa ka jingïateh kular ban pynsangeh ïa ka thma, kaba la pynmih da ka jinghiar thma jong ka Russia ha u Rymphang 2022.
Ka thma ka la nang kiew sha ka thma kaba shyrkhei tam ha Europe naduh ka thma bah ba ar, ha kaba da ki spah hajar ngut ki la ïap, da ki million ngut ki la hap ban phet krad na ki ïing ki sem jong ki ha Ukraine, bad bun na ki bynta ba shatei bad shathie jong ka Ukraine la pynjot.
Ka jingkren beiñ jong ka Russia ryngkat bad ka jingleit thombor ki drone bad ki ‘namding ba bun bah jong ka Russia ha ka jingïakren, kaba la pynjulor ia ki shlem sam bor ding jong ka Ukraine bad kaba la pynduh ïa ka bor ding bad ka jingpynsyaid ha ki jaka kiba kham jur ka jingkhriat.
U President ka Ukraine, u Volodymyr Zelensky, ha ka Sngi Ba-ar, u la ong ba ki jinghiar thma jong ka Russia ïa ka rukom pynmih bor ding jong ka Kyiv “ka pynskhem ba ki jingmut jingpyrkhat ha Moscow kim shym la kylla: ki dang ïai bteng ban bet ïa ka thma bad ka jingpynjot ïa ka Ukraine, bad kim shim khia ïa ka kam ïadei bad ka jingïadei.”
“Ïa ka kam jong ka kynhun ïakren jong ngi yn sa pynbeit katkum kane,” u la ong, khlem da batai bniah pat ia ka por bad ka sngi jong katei ka jingiakren.
Hynrei U President jong ka US, U Donald Trump, u la ong ba U President jong ka Russia, U Vladimir Putin, u la bat ïa la ka jong ka jingkular, da kaba kular shi taiew, ba un ym ktah ïa ka nongbah lane ïa ki shlem pynmih bor ding kiba kongsan jong ka Ukraine.
