Venezuela, Rymphang:
Da ki hajar ngut ki paidbah nongkyrshan jong u nongialam ka Venezuela- u Nicola Maduro, ki la ia mih paidbah hapoh Caracas ha ka Sngi Ba-ar ban iakhih pyrshah halor ka jingkem ia utei u nongialam katei ka ri bad ban dawa pyllait noh ruh ia u shi syndon.
“Ka Venezuela ka donkam ia u Nicolas”, la pyrta paidbah, shibnai haduh ka sngi naduh ba la pynhap ia u ha ka rukom kaba phylla bad la rah noh ia u ban ieng ha ka jingbishar halor ka jingkynnoh khaïi droks ha New York.
Ka President ba shipor, ka Delcy Rodriguez, ka la ïaid lynti naduh katei ka por ba la weng noh ia u na ka bor bad ka la pyrshang ban bat ïa ka jingkyrshan na ka United States hynrei ruh na ki nongkyrshan jong u Maduro ha ka sorkar jongka bad ki paidbah ka Venezuela.
Katto katne ngut ki nongïakhih, kiba bun na ki ki dei ki nongtrei sorkar, ki bat ïa ki dur jong u Maduro bad jong ka tnga jong u, ka Cilia Flores, kaba la shah kem ruh ha ka jingkhynra jong ka US.
Ka jingiaid paidbah, kaba la khot da ka sorkar, ka la jrong katto katne spah meter, ha kaba la synran lang da ki trok kiba pynsawa ia ki jingrwai.
“Kine ki briew kim dei ki nong America” ong u khun jong u Maduro, u Nicolas “Nicolasito” Maduro Guerra, uba dei u Symbud ha ka ïing dorbar thawaiñ jong ka Venezuela.
“Ngi la ioh ia ka jingsngew pyrshah kaba jylliew ia ka jingsynshar hima sima.”
Kiba bun ki nongïakhih ki la pynher ïa ki lama jong ka Venezuela bad ki la phong da ki rong saw jong ka kynhun synshar “Chavista” kaba la ai kyrteng na ka kyrteng u Hugo Chavez, uba long u nongai pateng ia ka bor ha u Maduro.
“Ngi sngew kynrum kynram, ngi sngewsih, ngi bitar. Ki don shibun ki jingsngew,” la ong u Jose Perdomo, u nongtrei jong ka municipal, uba 58 snem ka rta, uba la pynbna ruh ia ka jingkyrshan jong u “ia ki rai ba la shim da ka President ba shipor jong katei ka ri, ka Delcy Rodriguez.”
U la bynrap ba “da kumno- kumno ruh kin hap ban pynlait im ia u President jong ngi.”
