Washington, Rymphang:
Hapdeng ki kynrum- kynram kiba wan jia hapdeng ka United States bad ka Iran ha kine ki sngi, la ong ba ka United States sa shisien pat ha kane ka kynti, ka la bthah ia ki nongshong shnong jongka kiba don hapoh Iran, ba ki dei ban mih noh kloi na katei ka ri bad ban leit phet biang noh sha US. Ia kane ka jingbthah, la pynmih da ka tnat Embassy jong ka US kaba don hapoh Iran, ha kaba la bthah ia ki nong America baroh ba ki dei ban long kiba la pynkhreh ban mih noh na katei ka ri bad ba kin ym ap than na ka liang ka jingïarap jong ka sorkar US namar kan sa pynthud ia ka leit- ka wan ha ka por ba kyrkieh.
Ka ri America bad ka nongïaleh pyrshah jong ka, ka Iran, ki la don ha ka jingshah pynshitom beiñ naduh ka jingïakhih pyrshah jong ki Islam ha u snem 1979 bad ka jingeh jong ki nongshah rahbor ha Tehran. Hynrei ka jingïakynad ka la nang jur naduh ba u president jong ka America u Donald Trump u la byrngem ban thombor ïa ka Iran kum ka jingkynthoh halor ka jingpynshitom snam jong ka ïa ka jingïakhih kaba heh, kaba la sdang ha kaba kut jong u bnai Nohprah 2025.
U Trump, u la phah ïa kaei kaba u batai kum ka “armada” sha Gulf, kaba kynthup ïa ka jhad kit liengsuiñ USS Abraham Lincoln bad ki nongbud jong ka. Kane ka kynhun shipai ba la khot ka armada ka la don ha kane ka thaiñ naduh kaba kut jong u bnai Kyllalyngkot.
