Chennai, Rymphang:
Ka Tamil Nadu Congress ha ka sngi Palei ka la pynlong ïa ka jingïakhih da ka jingïaïaid paidbah kaba heh bha ha ka shnong Tambaram jong ka Chennai, ha kaba ka la sdang ïa ka jingkynthoh kaba jur ïa ka sorkar pdeng halor ka jingbujli noh ïa ka Mahatma Gandhi National Rural Employment Guarantee Scheme (MGNREGA) da ka VB-G Ram G scheme. Ki heh nongïalam jong ka Congress ki la ong ba kane ka sienjam kan ktah jur ïa ka jingim nongkyndong bad ki la kynnoh ba ka sorkar ba la ïalam da ka BJP ka la pyndam noh ïa ka pateng jong u Mahatma Gandhi na ka Flagship Welfare Program kaba la sdang nyngkong eh da ka UPA.
Ïa kane ka jingïaid paidbah la ïalam da u Symbud Myntri Rangbah ka Telangana u Mallu Bhatti Vikramarka bad u heh jong ka Tamil Nadu Congress Committee (TNCC) uba dei ruh u MLA u K Selvaperunthagai, ha kaba ki heh jong ka seng, kiba kynthup ïa u MLA barim u Peter Alphonse, ki la ïadon bynta lang.
Ki nongtrei ka Congress, ki la ïaid lyngba ka Tambaram da kaba pyrta ïa ki jingpyrta ban dawa ban pynïoh biang ïa ka MGNREGA, kaba ki la ong ba ka dei ka lad jingim kaba kongsan bha na ka bynta ki nongkyndong jong ka ri India.
Haba ïakren bad ka lad phah khubor, u Selvaperunthagai u la ong ba ka skhim ai kam ai jam ka la ai ka jingkyrshan kaba kongsan bha ïa ki Million tylli ki longïing, khamtam ha ka por ba don ka khlam COVID-19, ha kaba ki lad ïoh kam ïoh jam ha nongkyndong ki la shah ktah jur.
U Mallu Bhatti Vikramarka u la bynrap, “Kane (ban pynduh noh ïa ka MGNREGA) kan buh ïa ki Million ngut ki briew kiba duk ha ka jingisynei jong ki Corporate.”
U Alphonse u la kynnoh ba ka jingpynduh noh ïa ka kyrteng jong u Mahatma Gandhi ka pynpaw ïa ka jingshun jong ki jingmut jingpyrkhat pyrshah ïa u bad ïa ka jingïakhih laitluid. U la khot ïa kane ka sienjam ba ka dei ka jingpyrshang jong ka BJP ban pyndam noh ïa ka pateng jong u Mahatma Gandhi.
“Da kaba pynkynriah ïa ka 40 percent jong ka jinglut sha ki jylla, bun ki jylla kiba duk.
Ka seng ka la buh jingkylli ruh hato u Myntri Rangbahduh ka ri u Narendra Modi u ngeit ba ka jingbym don kam ha ki nongkyndong jong ka India ka la kut noh, da kaba kynthoh ba katba ka jingduk ka dang sah, ka prokram ai kam kaba khlaiñ ka dang long kaba donkam.
Ka BJP ka la kyntait ïa ki jingkynnoh, da kaba ong ba ka prokram thymmai kan pynleit jingmut ha kaba thaw ïa ki marpoh khyndew kiba jrong por bad ban pynpoi ïa ki jingmih kiba kham don jingmut bad kiba neh ha ka roi ka par.
Ki nongmihkhmat jong ka seng ki la kynnoh ba ka Congress ka pynlong politik ïa ki jingpynkylla ïa ka bha ka miat bad ka ïalam bakla ïa ki paidbah.
Ki nongïalam ka Congress ki la kyntait ruh ba katei ka jingïaid paidbah ka long ban pynbor ïa ka DMK kaba synshar ban ïoh kham bun ki seat ha ka ilekshon ïingdorbar ban wan bad ki la kyntait ba ka dei baroh kawei ban ïada ïa ka hok jong ki nongtrei nongkyndong.
