Mumbai, Rymphang:
Uwei u pulit C-60 Commando jong ki pulit ka Gadchiroli ha Maharashtra u la ïap ha ka sngi Thohdieng hadien ba u la mynsaw na ki jingshah siat kuli ha ka jingkhynra pyrshah ïa ki lehnoh Maoist kaba dang ïaid shakhmat ha ka thaiñ ba long khlaw ha Abujhmaad.
Ïa une u pulit la tip kyrteng kum u Deepak Chinna Madavi ba 38 snem ka rta bad uba dei u nongshong shnong jong ka Aheri bad u dei u trai shnong na ka shnong Mandra ha Damrancha kaba hap hapoh ka Aheri taluka.
Hadien ka jingshah siat u la mynsaw bad la pynkit ïa u da ka liengsuiñ na katei ka jaka khlaw kaba rben ha ka por mynstep bad la rah ïa u sha ka Sub-district Hospital ha Bhamragad, ha kaba u la khlad noh na ka jingjur palat ki jingmynsaw jong u ha ka por ba u dang shah sumar. Uwei pat u C-60 Commando, uba la tip kyrteng kum u Joga Madavi, uba shong ba sah ha Kistaipally ha Hyderabad, ula mynsaw ruh na ka jingshah siat kuli ha katei ka jingïasiat ba markylliang bad ki lehnoh ha ka miet jong ka sngi Palei.
La pynkynriah noh ïa u na katei ka jaka bad la pynkit ïa u da ka liengsuiñ sha Bhamragad. Ki heh pulit ki la ïathuh ba ka jinglong jingman ha kaba ïadei bad ka koit ka khiah ka la kham biang bad yn pynkynriah noh ïa u sha Gadchiroli ban ïoh ïa ka jingsumar kaba kham bha.
Ha kajuh ka por, ki bor pahara ki la lap sa ar tylli ki met ïap jong ki Maoist, kawei kaba dei jong u shynrang bad kawei pat jong ka kynthei, na ka jaka treikam ha ka step jong ka sngi Thohdieng.
Da kane, baroh ki met ïap jong ki Maoist kiba la ïoh tam haduh mynta ka sngi ki la poi sha ka lai tylli, ba kynthup ïa arngut ki shynrang bad kawei ka kynthei. Na katei ka jaka la ïoh ban tam ïa kawei ka suloi AK-47 bad kawei ka suloi self-loading rifle.
Ïa ka jingtip kaba bniah ban ithuh ïa ki Maoist ba la shah pynïap ym pat lah ban pynthikna.
Ki heh sorkar ki la ïathuh ba ka jingkhynra ka dang ïaid ha ka thaiñ Abujhmaad, ha kaba ka jingthwet ka dang ïaid shakhmat. La ap ïa ki jingtip ba kham bniah.
Ki bor pahara ha ka sngi Palei ki la ïoh ïa ka jingjop kaba khraw ha ki kam pyrshah Maoist jong ki ha ka distrik Bijapur jong ka Chhattisgarh da kaba pynïap ïa uwei u heh nongïalam jong ki Maoist ha ka por ba ki ïatreilang ha ki jaka ba don khlaw bad ki jaka lum hapoh u pud u sam jong ka thanat pulit jong ka Tarrem ha ka thaiñ ba shaphang Shathie jong ka distrik, la ïathuh ka lad phah khubor.
Da kaba pynkloi ïa ka jingpyntreikam hadien ba la ïoh ïa ki jingtip ba kyrpang shaphang ka jingdon jong u dkhot jong ka South Bastar Division Divisional Committee (DVCM) Udham Singh bad kiwei kiwei ki dkhot kieng atiar, ki kynhun jong ki shipai District Reserve Guard (DRG), Bijapur, bad CoBRA (Commando Battalion for Resolute Action) ki la pynlong ïa ka jingkhynra, la ong u Superintendent of Police jong ka Bijapur u Jitendra Kumar Yadav ha ka jingïakren bad ki nongthoh khubor.
Ka jingïasiat kaba hateng hateng ka la jia hapdeng ki bor pahara bad ki Maoist ha ka por kumba 7 baje mynstep bad ka la bteng haduh katto katne kynta hapdeng ka jaka khlaw kaba rben, la ïathuh ka tyllong khubor.
Hadien ka jingwad ïa ka jaka ba la don ka jingïasiat, la lap ïa ka met jong u Singh. Une u la shah thong da T.8 lak bad la ithuh ïa u kum u In-charge jong ka Platoon No 30 jong ka South Bastar Division, la ong u heh pulit.
U dei u nongshong shnong jong ka shnong Kottaguda kaba hap hapoh jong ka Basaguda police station bad u Singh u la leit pynïasoh bad ka Communist Party of India (Maoist) kum u dkhot jong ka kynhun ha u snem 2002-03 bad u la trei shitom khamtam ha khappud jong ka Chhattisgarh-Telangana.
Ha kine ki snem ba la dep, u la treikam ha ka Pamed Area Committee la kumba lai snem eiei. U la donkti ha ki khyndai tylli ki kam runar ba la ujor ha ki thanat bapher bapher jong ka Bijapur distrik.
