Imphal, Rymphang:
U Myntri Rangbah ka jylla Manipur, u Y. Khemchand Singh, ha ka 5 tarik, Rymphang, u la ong ba ban weng ïa ki jingeh ba ki briew kiba la shah pynkynriah jaka ki ïakynduh na ka jingshah thombor jong ki jaitbynriew ha kylleng ka jylla kan long ka mat ba hakhmat eh jong ka sorkar jong u.
Haba kren bad ki nongthoh khubor, u Singh u la ong ba ka sorkar shen kan sa thaw ïa ka lynti ïaid na ka bynta ban wanphai biang da kaba suk ïa ki briew kiba la shah beh shnong (IDPs) sha la ki jong ki ïing ki sem ha baroh ar tylli ki distrik kiba don ha ka jaka lum bad ka jaka them.
“Ka kam kaba nyngkong eh jong ngi kan long ban peit ïa ki jingeh jong ki IDP ha baroh ar ki lum bad ha them.
Ka jingeh kaba khraw ka long ba kim lah ban leit phai sha la ki jong ki ïing ki sem, ka sorkar kan sa thaw ïa ka jingpruid lynti shen”, la ong u Myntri Rangbah.
U Singh u la bam smai kum u Myntri Rangbah ka jylla ba la shah ktah ha ka jingshah thombor ha ka 4 tarik u Rymphang.
Ka Manipur ka la sakhi ïa ka jingkulmar jaitbynriew kaba la slem bha, kaba la pynlong ïa ki hajar ngut ki briew ban leit rieh tngen ha ki jaka sah ba shipor ha kylleng ki distrik bapher bapher.
