Imphal, Rymphang:
Ki bor pahara, ha ka jingïatreilang bad ka Forest Department, ki la pynjur ïa ki jingpyntreikam pyrshah ïa u jingdih pynbuaid bad ka jingsynshar ïa ki jaka ha kylleng ka Manipur, da kaba pynjulor ïa u Poppy ba la rep ha ka jaka kaba heh da 180 akar bad kurup ïa u drok uba bun ha ki jingpyntreikam ba kyrpang ha kine ki ar sngi ba la leit.
Ha ka 4 tarik u Rymphang, ka kynhun ba ïatreilang ka la pynjot ïa ki jaka rep Poppy be-ain kiba heh 180 akar ha ka lum Leingangching kaba don hapoh ka jaka kaba hap hapoh ka jingkhmih jong ki pulit ka Litan Ukhrul distrik. Ka jingkhynra ka la pynlong ruh ban pynpra ïa ki 20 tylli ki ïing rit kiba la lap ha ki jaka thung jingthung, kiba la ngeit ba ki dei kiba la pyndonkam da ki nongrep kiba donkti ha katei ka kam be-aiñ.
Shisngi shwa kane, ha ka 3 tarik u Rymphang, ki pulit ka Manipur ki la bat ïa kawei ka trok Tata Dumper ha ka jaka ba don ha Martyrs Park hapoh jong ka Mao police station ha Senapati distrik bad ki la kem ïa u nongñiah jong ka, uba la tip kyrteng kum u Athikho Elokho 27 snem ka rta uba shong ba sah ha ka shnong Kaibi ha Senapati. Na ka kti jong u, ki pulit ki la ïoh ban kurup ïa u drok ba 5.60 kilo. Ki mar ba la ïoh kurup ki kynthup ruh ïa ka kali kaba don ïa u number NL-07AA-5740, kawei ka mobile phone, ka pisa T.5,200, kawei ka Aadhaar card bad kawei ka PAN card.
