Guwahati, Rymphang:
U Myntri Rangbah ka Assam u Himanta Biswa Sarma ha ka 4 tarik u Rymphang u la ong ba ïa ka Special Intensive Revision jong ki thup kyrteng nongthep vote ha ka jylla yn pynlong ha ka “rukom kaba bniah bad kaba biang bha” ynda la dep ka ilekshon sha ka Ïingdorbar Thawaiñ, da kaba pynskhem ba ka rukom treikam kan long kaba kham bniah ban ïa ka jingpynkylla kaba dang ïaid shakhmat.
Haba kren sha ki nongthoh khubor hadien ka prokram ba la pynbna ha Sonari, u Sarma u la ong ba ka Special Revision ïa ki thup kyrteng ki nongthep vote ka dang ïaid mynta ha Assam, hynrei ïa ka SIR kaba pura yn sa pynlong hadien.
“Hangne, ka SIR kan long kaba ïar bha bad kaba dei ban leh. Nga la kyrpad ïa ka Election Commission ban leh ïa ka SIR wat mynta ruh, hynrei ki la pynlong ïa ka SR namar ka jingbym pynmih ïa ka NRC. Ngi pdiang sngewbha ïa ka SIR”, la ong u Myntri Rangbah.
Kane ka jingkren jong u Myntri Rangbah ka long halor ka jinglong bym pat lah ban pynbeit jong ka National Register of Citizens ha Assam.
Ka NRC ba khatduh, kaba la pynmih ha ka 31 tarik Nailar, 2019, ka la kyntait ïa ki 19,06,657 ngut ki briew, katba 3,11,21,004 tylli ki kyrteng la kynthup na ki 3,30,27,661 ngut kiba aplai.
Hynrei ïa ka NRC ym shym la pyntip da u Registrar General ka ri India haduh kine ki sngi, ka daw kaba u Sarma u la ong ba ka la ktah ïa ka rai jong ka Election Commission ban jied ïa ka Special Revision ha ka jaka jong ka SIR ha kane ka kynti.
Katkum ki jingtip ba thikna, ka Draft Electoral Roll ba la pynkhreh hadien ka jingpynkylla kyrpang kaba dang ïaid shakhmat ka pynpaw ïa ka jingdon jong ki nongjied baroh 2,52,01,624 ngut, kaba pyni ïa ka jingkiew kaba 1.35 percent na ka thup kyrteng ba khatduh ba mynshuwa ba la pynmih ha u bnai Kyllalyngkot 2025. Hapdeng ka 6 tarik, Kyllalyngkot bad 27 tarik, Nohprah, kumba la ïohi na ka jingpynrung kyrteng ki la don baroh 4,47,196 tylli bad la pyndam noh ïa ki 4,47,196 tylli ki kyrteng.
Ha ka jingpynkylla, ki heh sorkar ki la ithuh ïa 4,78,992 ngut ki nongjied kiba la ïap, 5,23,680 ngut ki nongjied kiba la pynkynriah ïa ka jaka sah jong ki, bad 53,619 ngut ki jingjia kiba la rung bunsien.
Hynrei na ka liang ka tnad ilekshon ka la pynshai ba ïa kine ki kyrteng ym pat lah ban weng na ka thup kyrteng.
Ïa ki jingpyndam ne jingpynbeit yn sa leh tang hadien ba la ioh ïa ki aplikeshon ba pura ha ka por ba dang ïaid shakhmat jong ki jingdawa bad jingpyrshah.
Ïa ka thup kyrteng jong ki nongthep vote ba khatduh na ka bynta ka Assam la buh ban pynmih ha ka 10 tarik u Rymphang, 2026.
