Chennai, Rymphang:
U Myntri Rangbah ka jylla Tamil Nadu u MK Stalin u la khmih bniah halor ki jingthmu jong ki rukom pyntreikam kiba thymmai ha kaba ïadei bad ki jingpule, kane ka jingkhmih bniah jong u, ka la long hadien ba la dep ban plie paidbah ïa ka State Education Policy (SEP) na ka bynta ki skul ha Anna Centenary Library ha u snem ba la lah.
Ka sorkar jylla kaba la ju pyrshah beit ïa ka NEP, ka la thaw ïa ka komiti ba la khlieh da u Justice D Murugesan uba la shongthait ha u bnai, Ïaïong, 2022 ban shna ïa ka SEP hapoh shisnem. Hynrei hadien la pynjlan ïa ka por bad la aiti ïa ka polisi ba khatduh sha ka sorkar ha u bnai Naitung, 2024.
U Myntri ba dei khmih ïa ka tnat pule-puthi u Anbil Mahesh Poyyamozhi u la ong kham hashwa ba ïa kane ka SEP yn plie paidbah ha ki ar bynta- kawei ka kynthup ïa ka pule puthi ha ki skul bad kawei pat ïa ka pule puthi jong ki kyrdan kiba kham shalor. Hynrei ka policy ba la aiti sha ka sorkar ka kynthup ïa ka Early Childhood Care and Development (ECCD), School Education bad Higher Education.
“Ka policy ka la khmih lynti ruh ba kan kynthup ïa ki kyndon ban pynrung ïa ki kor ki bor kiba dang mih kum ka Artificial Intelligence (AI) ha ka kyrdan skul bad ban ai jingmut ïa ka,” ong uwei u heh ophisar.
Ki jingai jingmut ba kongsan jong ka komiti ki kynthup ïa ka rukom hikai ban pynrung ïa ka jingïaryngkat ha ka imlang-sahlang bad ka hok, ban pynkhlaiñ ïa ki skul sorkar halor ka jingai ïa ka RTE Fund sha ki jaka pule shimet, ban bat ïa ka rukom hikai skul kaba la don lypa ha ka jaka ban shim ïa ka rukom treikam jong ka NEP, bad ban bteng ïa ka polisi ar tylli ki ktien da kaba pynleit jingmut bha ha ka ktien Tamil.
Ka kaiphod ka la ai jingmut ruh ban pynkylla ïa ka rukom bishar bniah kaba la don lypa, da kaba ong ba ki jingkhmih bniah ïa ka kot ki dei ban long ha ka rukom katkum ki kyndon bad ki jingmynjur ïa ka jingthung kam ïa ki nonghikai Physical Education na ki klas jong ki skul Primary.
