New Delhi, Rymphang:
Ka rai ba la wanrah da ka sorkar Karnataka ha ka ïing dorbar thawaiñ, kaba pyrshah ïa ka jingpynduh noh ïa ka aiñ ai kam ha thaiñ nongkyndong jong ka Mahatma Gandhi National Rural Employment Guarantee Act (MGNREGA)2005, bad ban bujli ïa ka da ka Viksit Bharat-Guarantee for Rozgar and Ajeevika Mission (Gramin) (VB-G RAM G) Act, 2025, la pdiang ha ka taïew ba la lah, wat haba ka BJP bad ki dkhot jong ka JD(S) ki la pynlong ïa ka jingïakhih ha baroh ar tylli ki ïing dorbar bad ka Council.
Ha kawei pat ka liang, u Myntri Rangbah ka jylla Andhra Pradesh u N Chandrababu Naidu u la pynpaw ïa ka jingdonkam jong ka Viksit Bharat Guarantee kaba dang shu wanrah thymmai na ka bynta ka Rozgar Ajeevika Mission (Grameen), kaba la tip kum ka VB G RAM G scheme, ha kaba plie ïa ki lad ai kam ai jam ïa ki baduk katba ha kajuh ka por ban tei ïa ki jingtei kiba neh ha ki shnong ki thaw.
U la ban jur ba ïa kane ka skhim, kaba la wanrah da ka sorkar pdeng ha u bnai Nohprah ba la dep ban bujli ïa ka MGNREGA, dei ban pyntreikam ha ka rukom kaba pynkhlaiñ ïa ki jingtei ha nongkyndong khlem da pynthut ïa ki kam rep.
Ha ka jingïakynduh ha ka ophis treikam jong u bad u President ka BJP AP u Madhav bad u Myntri ka Jana Sena u Kandula Durgesh, u Myntri Rangbah u la ïakren halor ka jingheh jong kane ka skhim bad ka jingmyntoi kaba lah ban wanrah na ka bynta ka jylla.
U Naidu u la kdew ba ki kyndon thymmai ki ai 25 sngi ka jingtrei kaba kham bun haba ïanujor bad ka NREGA, katba ki pynthikna ruh ba ka kam jong ki nongrep kan ym shah khanglad.
U la pynkynmaw ba ha ka por ba dang synshar ka TDP kham mynshuwa, la shna haduh 25,000 km ki surok nongkyndong hapoh ka NREGA.
Ka skhim G RAM G, u la ong, mynta ka ailad ban leh shuh shuh ïa ki kam kum ki kor pynshai da ka sngi, ki ban pynbha ïa ki jingtei jong ki shnong.
Haba pynïadei ïa kane ka skhim bad ka jingthmu jong ka sorkar synrop, u Naidu u la ong ba kane ka prokram kan kyrshan ïa ki shiphew tylli ki nongrim ba la buh na ka bynta ka jingroi jong ka AP .
U la ai jingmut ban pynïasoh lang ïa ka G RAM GI bad kiwei pat ki skhim pdeng kum ka Jal Jeevan Mission ban pynthikna ia ka jingpynbiang ïa ka umbam umdih, bad ban pyndonkam ïa ka na ka bynta ki projek kum ki skul, ki hospital, ki jaka paidbah, ki jaka rep, bad ki jaka ri masi.
U la ban jur ba ki dorbar shnong ki dei ban mynjur ïa ki kam ban shim, bad baroh ki kam ki dei ban long kiba shai ban buh jingthoh online.
U Durgesh ka la pynpaw ba kane ka skhim ka ai lad ïa ki projek ban pynneh pynsah ïa ka jingpyllang um, kynthup ïa ki check dam ha ki jaka nongkyndong bad ki jaka khlaw, kiba lah ban pynbha bad pynkyrsoi ïa ki umpohliew bad pynthikna ïa ka jingbiang um.
U la ïaroh ïa ki jingbthah jong ka sorkar pdeng ban ïada na ka bamsap bad ban pynkhlaiñ ïa ki tnad treikam jong ka thaiñ lyngba ka jingïashim bynta lang jong ki sorkar jylla bad sorkar pdeng.
U president ka BJP AP, u Madhav, u la kdew ba ïa kane ka skhim la shna da ki lad jingïada kiba khlaiñ pyrshah ïa ka bamsap, da kaba pyndonkam ïa ki kor ki bor kiba thymmai kum ka jingpeit bniah ïa ka jaka bad ka jingpeit bniah ïa ka jaka.
U la pynthikna ba ka jingsiew bai bylla sha ki nongtrei nongkyndong kan long ha ka por kaba biang, ym kum ka jingpynslem kaba la ïohi ha ki por ba la leit noh.
U Madhav u la bynrap ba da kaba pynïasoh ïa kane ka skhim bad ka PM Gati Shakti, ka sorkar pdeng ka thmu ban pynthikna ba ki jingmyntoi na ka roi ka par kin poi sha baroh ki bynta jong ka imlang sahlang.
Ki heh na ka tnad Panchayati Raj ki la pyntip sha u Myntri Rangbah ka jylla halor ki kyndon jong ka skhim, da kaba kdew ba mynta la pynrung lang ïa ki katto katne ki jaka ki bym shym la ktah hapoh ka NREGA.
Kumba ka long mynta, na ka liang ki nongshong shnong ha ki thaiñ nongkyndon ki la duh jingkyrmen kumba la sakhi na ki rukom treikam jong kane ka skhim ba la thmu ban pynkylla, bad ki la ap ïa ka rai na ka sorkar ba kumno ba kan leh khnang ba kin ym shah ktah lada ka la wanrah bujli da kiwei pat ki skhim.
Kane ka jingthmu pyntreikam ka la wanrah shibun ki jingkynthoh pyrshah ïa ka sorkar BJP kaba la thmu ban pynduh pyndam ïa kane ka skhim jong ka longïing ki Gandhi, kaba la kyrshan ha ki snem ba la leit, ïa ki nongshong shnong ha ki thaiñ nongkyndong, khamtam ïa kito kiba kyrduh ha ki lad ïohkam ïohjam bad kiba la im jakpoh na kaba bylla hapoh ka jingpyntreikam jong kane ka skhim MGNREGA kumba ka long.
