Washington, Rymphang:
Ka NATO ha kane ka kynti, ka la sdang ïa ka jingthmu shipai na ka bynta ka Arctic Sentry mission, ong u nongaiktien jong ka tnad shipai jong ka SHAPE ha ka Sngi Ba-ar, ha ka phang jong ka jingïakynad hapdeng ka U.S. bad ki paralok na Europe halor ka Greenland.
Ka jingkren ba man ka por jong u President ka US Donald Trump ba u kwah ban ioh ia ka Greenland, da kaba kynnoh ia ki paralok Europe ba kim shym la lah ban pynskhem bha ia ka dewlynnong kaba heh jong ka Arctic pyrshah ia ka Russia lane ka China, ka la pynmih ia ka jingiakajia bad ka Copenhagen halor ki jaka jong ka Denmark shabar duriaw bad ka la pynmih ia ka jingiakynad bad ka NATO.
“Ka jingthmu ka dang ïaid shakhmat na ka bynta ka jingtreikam jong ka jingpahara ba la pynkhlain da ka NATO, kaba la ai kyrteng Arctic Sentry,” ong u Colonel Martin O’Donnell, u nongaiktien jong ka Supreme Headquarters Allied Powers Europe, haba pynskhem ïa ka khubor jong ka kot khubor German Spiegel.
U la kyntait ban ai jingtip shuh shuh namar ba ka jingthmu ka dang shu sdang.
Hadien ba ki la ïakynduh ïa u Trump ha Davos ha u bnai Jymmang, u Secretary-General ka NATO, u Mark Rutte, u la ong ba ki la ïakren halor kumno ki paralok ka NATO kin lah ban ïatreilang ban pynthikna ïa ka jingshngaiñ jong ka Arctic, kaba kynthup ym tang ïa ka Greenland hynrei ïa ki hynriew tylli ki ri ka NATO kiba don jaka ha ka Arctic.
