Shillong, Rymphang 24
Ka Archery Association of Meghalaya (AAM) ka la wan shakhmat ban pynbna ba ka la ïoh ka bhah ban pynlong ïa ka Khelo-India NTPC North East Zone Open Archery Tourna-ment ha kane ka nongbah.
Haba ïakren bad ki nongthoh khubor ha ka sngi Ba-ar, u President ka synjuk u Bah Païa B. War Nongbri ha ryngkat ki dkhot jong ka, ki la pyntip ba na ka liang ka Archery Association of India ki la shah ïa ka synjuk ba kan pynlong ïa kane ka lympung ha kane ka nongbah. “Ïa kane ka jingïakop yn pynlong ha SAI Training Centre kaba ha NEHU ha ka 26 bad 27 tarik mynta u bnai. Ki don 6 tylli ki jylla na ka thaiñ shatei lamihngi ki ban wan ïashim bynta,” la ong u Bah Païa.
U la ïathuh ruh ba kumba 126 ngut ki ‘rang bad ki ‘thei ïalehkai kin wan ïashim bynta ha kane ka jingïakop. Te kumta na ka liang ka synjuk ka la khot sngewbha ïa baroh kiba sngewtynnad ïa kane ka jingïalehkai ba kin wan sakhi lang bad ai mynsiem ïa ki samla ïalehkai jong ka Jylla.
Shuh shuh ula ïathuh ba kin don haduh 36 ngut ki nongïalehkai na ka jylla Meghalaya ki ban wan shim bynta, na Arunachal Pradesh ki don 5 ngut, na Assam ki don 36 ngut, na Manipur ki don 28 ngut, na Nagaland 11 ngut bad na Sikkim ki don 10 ngut.
Haba ïa dei bad ka khusnam, na ka liang ka Khelo India ka la pynbna ïa ki song pisa kiba long T.20 hajar tyngka ïa kiba wan ba nyngkong, ba-ar kin ïoh T.15 hajar tyngka, balai T.10 hajar tyngka bad ba saw kin ïoh T. 5 hajar tyngka. Na ka liang ka synjuk ka la pynkhreh ïa ki takma ryngkat bad ki syrnod na ka bynta ki nongjop.
