Shillong, Rymphang 24
Ka lympung ïalehkai 5th District League T20 Cricket Tournament 2026 ba la pynïaid da ka East Khasi Hills Cricket Association ka la nangjam shaphrang ha kaba ka Rangshken ACC bad ka Cricket Smit ki la khur jingjop ha ka sngi Ba-ar.
Ha kane ka jingïakhun kaba la long ha madan Saitsohpen kaba la long ha Sohra, ka Rangshken ka la pynliem noh ïa ka Marbisu CC da 7 wiket. Ka Marbisu ka la shimti ban tied nyngkong ha kaba la kamai 176 run ha ki 20 over. U Rohan Rai u la tied 42 run na ki 24 bol. Katba u Kyrmenskhem Nongrum u la khur 2 wiket na ka bynta 22 run ha ki 4 over.
Haba wan shimti ïa ka pali kaba ar, ka Rangshken ka la lah ban kynjoh sha ka thong da kaba kamai 177 run bad shah pynhap 3 wiket ha ki 18.4 over. Kane ka la wan lyngba ka jingïalehkai bha u Arjune Nongdhar uba la tied 74 run na ki 54 bol. Katba u Rohan Rai u la khur 2 wiket na ka bynta 21 run ha ki 3.4 over. Ïa ka nam Player of the Match la khur da u Arjune Nongdhar.
Haba phai sha kawei pat ka jingïakhun kaba ar, ka Cricket Smit ka la jop da 73 run ïa ka Sportopia SCC. Ka Cricket Smit ka la kam trai ban tied nyngkong ha kaba ka la kamai 147 run bad shah pynkhyllem 10 wiket ha ki 19.4 over. U Bashaikupar Nongdhar u la khyrwit ïa ka shiteng spah kaba 56 run na ki 33 bol. Katba u Gedilbert Swer u la khur 3 wiket na ka bynta 9 run ha ki 3 over.
Haba wan beh ïa ka thong, ka Sportopia SCC ka la kamai 74 run bad shah pynhap 10 wiket ha ki 17.2 over. U Bansiewkylliang Lapasam u la tied 16 run na ki 14 bol. Katba u Elbrenroy Mawthoh u la khur 4 wiket na ka bynta 14 run ha ki 3 over. Ïa ka nam Player of the Match la khur da u Elbrenroy Mawthoh.
