Washington, Rymphang:
Ka America ha ka sngi Nyngkong ka la kynnoh ba ka China ka la pynbun bha ïa ki tiar thma jong ka, bad ka la pynrem ar shah ïa ka jingkynnoh ba ka Beijing ka la pynlong ïa ki jingpyrshang nuclear ba rieh, da kaba dawa biang ba kan dei ka bynta jong kano kano ka jingïateh kular ban tehlakam ïa ki tiar thma ha ka lawei.
Ka US ka la ong ba ka jingpynkut noh ha kaba sdang jong une u bnai ïa ka New START, ka jingïateh kular ba khatduh hapdeng ki ri nuclear ba ha khlieh duh ka America bad ka Russia, ka wanrah ïa ka lad ban ïoh ïa ka “jingïateh kaba kham bha”, kynthup ïa ka China.
Ka China ka la kyntait paidbah ïa ki jingkhot ban rung sha katei ka jingïakren halor ka jingïateh kular kaba thymmai kaba lai liang.
U Christopher Yeaw, u Assistant Secretary jong ka US, na ka bynta ban tehlakam ia ki tiar thma bad ka jingbym pynphriang ia ki tiar thma, u la ong ha ka jingialang halor ka jingpynduh tiar ialeh ha Geneva ba ka jingiateh New START ka la don jingduna kaba jur bha.
“Lehse ka jingbakla kaba khraw tam jongka, ka long ba ka New Start kam shym la ai jingkheiñ ïa ka jingpynmih tiar nuclear kaba khlem pat ju jia mynno mynno ruh, bad kaba khlem shai da ka China,” u la ong.
“Ngi ngeit ba ka China ka lah ban ioh ia ka jinglong mar ryngkat hapoh saw ne san snem ban wan”, u la ong, khlem da batai bniah ia kaei kaba u mut da ka jinglong mar ryngkat.
Baroh ar tylli ki ri, ka Russia bad America ki don palat 5000 tylli ki tiar thma nuclear, katkum ka kaiphod ba la ioh lum da ki tnat ba dei khmih.
