Ranchi, Rymphang:
Kumba la ïathuh ka tyllong khubor hynnin ka sngi, kaba la wan na ki heh pulit, la ong ba baroh hynñiew ngut ki briew kiba don ha kawei ka Air Ambulance ki la khlad noh ha ka por ba ka liengsuiñ ka la hap hajan Simaria ha ka Jharkhand Chatra distrik.
Ïa kiba la khlad noh la rah sha hospital na ka bynta ban leh ïa ka Post-Mortem.
Ka Beechcraft C90 Air Ambulance, kaba la pynïaid da ka Redbird Airways Pvt Ltd, ka dang ïaid na Ranchi sha Delhi, ha kaba ka la hap ha ka janmiet jong ka lah sngi U Blei, ha ka jaka jong ka Bariatu Panchayat jong ka Simaria, kaba don shapoh eh jong kawei ka khlaw. Baroh hynñiew ngut kiba don ha ka liengsuiñ, kynthup ïa arngut ki pilot, ki la duh noh ïa la ka jong ka jingim.
“Ngi la wanrah ïa baroh hynñiew tylli ki metïap na ka bynta ban leh ïa ka post-mortem ha Sadar Hospital, Chatra. Ïa ka jinghap jong ka liengsuin ngi dang tohkit,” la ong uwei u heh sorkar ha ka jingïakren bad ki nongthoh khubor.
Kane ka liengsuiñ ka la kiew na Ranchi Airport ha ka por 7:11 baje janmiet bad ka la jah rngai noh ha ka por 7:30 baje janmiet. Ka la duh ïa ka jingïoh ïakren bad ka Air Traffic Control da kumba 20 minit hadien ba ka la mih, u la ong.
U Director jong ka kad liengsuiñ jong ka Ranchi, u Vinod Kumar, u la ong ba ka jinglong ka suiñbneng ka lah ban long ka daw kaba lah ban pynlong ïa katei ka jinghap ka liengsuiñ, watla ïa ka daw kaba thikna yn sa tip hadien ka jingtohkit kaba bniah, ong ka tyllong khubor.
Kiba la khlad ha ka jingjia, ki dei kiba la tip kum u Captain Vivek Vikas Bhagat, Captain Savrajdeep Singh, Sanjay Kumar, Dr Vikas Kumar Gupta, Sachin Kumar Mishra, Archana Devi, bad Dhuru Kumar.
Ka la long ka khubor kaba sngewsih halor kane ka jingjia, ha Chatra distrik namar ba ki bahaïing hasem jong kito kiba la khlad noh ki la pynpaw ïa ka jingkyndit bad jingbym sngew lah ngeit halor ka jingduh kaba kynsan kynsan ïa ki baïeid bathoiñ jong ki.
U Deputy Commissioner ka Chatra u Keerthishree G kham hashwa ha ka jingïakren bad ki nongthoh khubor, u la ong ba ïa ki metïap jong baroh hynñiew ngut la kit na ka jaka ba la jia ka jinghap ka liengsuiñ bad la pynkit ïa ki sha Chatra hospital na ka bynta ban leh ïa ka post-mortem.
Ha ka kyrwoh ba la pynlait da ka Directorate General of Civil Aviation (DGCA) ka la ong ba katei ka liengsuiñ Beechcraft C90 (VT-AJV) ka dang pynïaid ïa ka liengsuiñ ban pynpoi ïa ki nongpang ha ka thaiñ Ranchi-Delhi ha ka por ba ka la hap ha Kasaria Panchayat jong ka Chatra distrik.
