Shillong, Rymphang 24
Ka Sorkar Meghalaya ka la pyndep ïa ka jingshim jaka jong ki riew shimet bad ïoh ïa ka jingbit jong ka tnad ïada ri ban pynheh ïa ka kad liengsuiñ jong ka Shillong, kaba plie lad ïa ka jingwan hiar ki liengsuiñ kiba heh.
Haba jubab ïa ka cut motion ha ïingdorbar, u Symbud Myntri Rangbah ka Jylla u Bah Sniawbhalang Dhar u la pyntip ba ïa mynta ka Umroi Airport ka dang dei ka kad kaba lah ban hiar tang ki liengsuiñ ATR-72 namar ba ka runway ka jrong tang 1829 meter.
“Ka Sorkar ha ryngkat ka jingïatreilang bad ka AAI, kila pynkhreh ïa ka master plan, ban nang pynheh ïa ka runway da 2400 meter, ka ban pynlah ïa ka jinghiar ki liengsuiñ ha runway 22 bad ban her na ka runway 04.
Ka jingpynheh ka donkam sa 22 akar ka jaka-11.75 akar ka jaka ki riew shimet bad 10.3 akar jong ki shipai.
U Deputy Commissioner ka Ri-Bhoi, u la pyndep ïa ka jingthied jaka jong ki riew shimet ha ka 28 tarik Kyllalyngkot, 2026 ha ka jinglut ba T.72.17 klur kynthup ka jingsiew bailutksan bad ka jingaiti sha ka AAI kala nang ïaid.
Ïa ka jaka shipai, u Bah Sniawbha u ïathuh ba ka Ministry of Defence kala ai ïa ka Advance Working Permission ha ka 17 tarik Ïaïong, 2025 hadien ka jingïabujli jaka kaba shongdor katjuh. Ka Jylla kala ithuh ïa ka jaka ba 7.7255 akar ha shnong Umroi Madan, kaba ka jingmang antad ban thied ka long T.23.55 klur.
“Ka jingïasoi ïa ka MoU kan sa long ha u bnai Lber, 2026 bad ki shipai,” u la bynrap.
