Jowai, Rymphang 24
Ka Goodwill Mupliang SC ka la pynliem noh ïa ka Tympang CC da 9 wiket na ka bynta ban khur jingjop ha ka District Cricket League 2026 ba la pynïaid da ka West Jaiñtia Hills District Cricket Association (WJHDCA).
Kane ka lympung ïalehkai ka la sdang ha ka 23 tarik mynta u bnai ha madan Khliehtyrshi ha kaba ka Ummulong SC ka la jop ïa ka Wahïajer SC da 37 run.
Haba phai sha ka jingïalehkai ha ka sngi Ba-ar, ïa ka kynting pisa la jop da ka Tympang CC ha kaba ka la kam trai ban tied nyngkong bad kamai 135 run ha ki 35 over. U Wallambok Nongkhlaw ula tied 27 run na ki 35 bol kynthup ïa 4 tylli ‘four’. U kapten ka kynhun u Kenny Phawa uba khlem shah pynkhyllem, u la ïoh 25 run na ki 58 bol kynthup 3 tylli ki ‘four’. Katba u nongkawang bol jong ka Goodwill Mupliang, u Sandy Kharshandi u la khur 4 wiket.
Ka Goodwill Mupliang SC ha ka pali ban beh ïa ka thong, ka la kamai 136 run bad shah pynhap shi wiket ha ki 10.5 over. U Byforcestar Dhar (not out) u la tied 70 run na ki 36 bol ryngkat 2 tylli ki ‘six’ bad 13 tylli ki ‘four’. U Sandy Kharshandi (not out) u la ïoh 36 run na ki 19 bol ryngkat 2 tylli ki ‘six’ bad 4 tylli ki ‘four’ bad ula khur ruh ïa ka nam Man of Match.
