Mumbai, Rymphang:
U nongïalam ka Shiv Sena (UBT) u Sanjay Jadhav ha ka lah sngi U Blei u la kynthoh ba ka sorkar Maharashtra ka la pynduh ïa ka kamai kajih jong ki nongrep da kaba shim ïa ka jaka na ka bynta ban shna ïa ka surok bah kaba la thmu ban shna ïa ka surok bah Nagpur-Goa Shaktipeeth Expressway.
U Sanjay Jadhav, uba dei u dkhot jong ka ïingdorbar, u dei uba ïalam ïa ka jingïakhih jong ki nongrep ha Parbhani. La pynlong ruh ïa ki jingïakhih kiba kum kine ha ki bynta jong ka distrik Beed.
Kane ka Expressway kaba shongdor T.86,300 klur kumba la thmu kan jrong 810 kilomitar bad ban ïaid lyngba ki 12 tylli ki distrik jong ka Maharashtra. La khmih lynti ba kane ka khyrdop kan pynduna ïa ka por ïaid hapdeng ka Nagpur bad Goa sha ka 8 kynta eiei.
Haba ai jingkren ha kane ka jingïalang, u Jadhav u la kynnoh ba kane ka jingïakhih ban shim jaka ka long ban ai jingmyntoi ïa ka Adani Group da kaba pynsuk ïa ka jingkit ïa ki marpoh khyndew na ka thaiñ Vidarbha sha Goa.
U la kynnoh ba ki nongrep ki shah pynbor ban ïakhlad noh bad ka jaka jong ki kpa tymmen kaba pyndap pynbiang ïa ki longïing jong ki. Katkum ka jingong jong u, ka sorkar ka dang pynbeit ïa ki tender ha ka rukom kaba lah ban ai jingmyntoi ïa ki kompeni kiba heh.
U Jadhav, u la kynthoh ruh ïa u Eknath Shinde, u Symbud Myntri Rangbah ka Jylla, da kaba buh jingkylli ïa ka jingkylla jong u, halor katei ka projek. U la ong ba kham mynshwa u Shinde u la ai jingmut ba yn pynduh noh ïa ka Shaktipeeth Expressway.
Ha kaba ïadei bad u Bal Thackeray, u Jadhav u la ong ba ki nongïalam ki dei ban kynmaw ïa ki jinghikai jong u shaphang ban ïeng na ka bynta ki riewpaidbah. U Jadhav u la kynnoh shuh shuh ba ka bai lutksan ba la tyrwa sha ki nongrep kan long kaba duna bad ba kum kine ki skhim pynroi kiba heh ki lah ban long ki lad ban bamsap.
Ha ka jingthoh ha ka rynsan Social Media ha ka rynsan X, u Jadhav u la ong ba ka khubor na ki nongrep ka long kaba shai bha, dei ban pynduh noh ïa ka Shaktipeeth Expressway. U la buh jingkylli ïa ka jingdonkam ban don ïa ka surok bah kaba thymmai haba ka surok bah kaba ïaryngkat bad ka Ratnagiri-Nagpur ka la don lypa. U la kynnoh ba katei ka projek thymmai kan ai jingmyntoi tang ïa ki kontraktor.
U Jadhav u la kam ba da ki hajar akar ki jaka rep kiba seisoh ha kylleng ki 12 tylli ki distrik, kiba kynthup ïa ka Parbhani, Nanded, Sangli bad Kolhapur, kin shah ktah. U la ong ba ki kper rep kait, sohmarit bad soh Grape kin sa shah pynduh pyndam ha ka jingpyntreikam ïa kane ka projek.
“Lada ka khyndew ka shyiap jong ngi ka la lut, ngin bam aïu, kumno ngin im?” u la thoh da kaba bynrap ba katei ka mat kam ktah tang ïa u hynrei ïa ki nongrep ha kylleng ki jaka jong ka Parbhani distrik.
U MP u la kynnoh ruh ba ki nongrep kiba pyrshah ïa ka jingthew jaka ki shahkem ha ka por miet, ki pynmih ïa ki jingpynbna khang shnong bad wat ban shah thombor ruh. U la kynnoh ba ha ki thaiñ Sajapur-Jawala, ki nongrep bad ki longkmie ki la shah thombor bad la buh ruh ïa ka kynhun pulit kaba heh. U la buh jingkylli hato kum kine ki jingleh ki ïadei bad ki jinglong jong ka synshar paidbah.
U Jadhav u la ong ba ka sorkar mynshwa ka la kular ha ka por ilekshon ba yn pynsangeh noh ïa katei ka projek, hynrei mynta la pynkhih ïa ka da ka bor. U la maham ba ki nongrep kin ym sngap jar bad kin bteng ïa ka jingïakhih jong ki tad haduh ban da weng noh ïa ka jingthmu pyntreikam ïa ka surok bah. “Kane ka jingïakhun kan ïai bteng haduh kaba kut”, u la ong.
