Shillong, Rymphang 24
U Myntri ka tnad ka koit ka khiah, Bah Wailadmiki Shylla ha ka Sngi Ba-ar u la ïasam ïa ki jinglap na ka jingtohkit halor ka jingkhlad noh u MP ka Shillong, u Dr. Ricky A.J. Syngkon, da kaba pynpaw ba ki nongtrei ka koit ka khiah ha Mawïong-CHC ki la shimkhia mardor bad leh katba lah katkum ka jinglah jong ki haba ïadei bad kane ka bynta.
U Bah Wailad u la ïathuh ba ka jingtohkit, kaba la leh da ka District Medical and Health Officer, East Khasi Hills, ka la pyntikna ba ka jingpeit bniah ba kyrkieh (emergency assessment) bad ki lad jingïarap ‘Basic Life Support’ la pyntreikam mardor mar syn poi u Dr. Ricky ha CHC ha ka 19 tarik u Rymphang, 2026, hadien ba u la kyllon ha ka por ba u dang ïalehkai phutbol.
“Ki nongtrei kiba la don ha katei ka por, ki la leh ïa ka kam hapoh u pud bad ka jinglah ban trei jong ka CHC, kynthup ïa ka jingpeit bniah ba mardor, ka jingai ‘Oxygen’, ka jingleh ïa ka CPR bad ka jingphah sha kawei pat ka jaka sumar kaba kham halor ha ka por kaba biang,” ong u Bah Wailad, da kaba bynrap ba ym shym la lap ïa ka jingkyntait ban ai jingsumar ne jingpynslem ha ka ban phah noh sha kiwei pat ki jaka sumar.
Ïa u Dr. Ricky la phah rah noh sha Dr. H. Gordon Robert Hospital, ha kaba la pynbna ba u la khlad noh. Ka tnad ka koit ka khiah ka la pynpaw ïa ka jingsngewlem sha ki bahaïing ha sem jong u Dr. Ricky bad pdiang ïa ka jingkhlad ba kyndit na ka ‘Cardiac Arrest’.
Na ka liang u Bah Wailad u la kren ruh halor ki jingkynnoh bym don doktor ha Mawïong-CHC ha ka por ba la wanrah ïa u MP ka Shillong, u Dr. Ricky A.J. Syngkon sha katei ka jaka da kaba kdew ïa ka jingduna doktor ha ka Jylla.
“Ngi don ïa ka jingduna doktor kaba khraw ha ka Jylla jong ngi,” la ong u Bah Wailad haba pynshai ba na ki 4 ngut ki doktor kiba la buh ha Mawïong-CHC, 2 ngut ki don hapdeng ka shuti ‘Postgraduate’ bad uwei pat u la shah pynkynriah kam noh sha Khliehriat CHC, kaba ieh noh pat shadien sa tang ïa uwei u doktor ban khmih ïa katei ka jaka sumar.
U Myntri u la ong ba utei u doktor uba don marwei u la don hapdeng ka jingïakren lyngba ka ‘phone’ bad u la batai ïa ka nos katba ka dang ai ïa ka jingsumar ba kyrkieh.
“U la don hangta baroh shisngi naduh 9 baje mynstep haduh 4 baje janmiet ban peit ïa ki nongpang OPD…ka nos ka la ïakren bad u doktor lyngba ka ‘phone’ bad hapoh ka jingbatai jong u doktor,” la ong u Bah Wailad.
Na ka liang u Bah Wailad u la ong ba ka Sorkar ka dang trei ban khmih ïa ka jingduna ki doktor, hadien ba ka la ïoh ïa ka jingmynjur ban thung ïa 150 ngut ki doktor lyngba ka kontrak.
“Shen ngin sa pynlong noh ïa ka jingthung kam,” u la bynrap.
